Хот байгуулалт, барилга, орон сууцжуулалтын сайдын шуурхай хуралдаан өнөөдөр /2025.05.06/-ны өдөр “Төрийн орон сууцны корпораци” ТӨХХК-ийн байранд өргөн бүрэлдэхүүнтэй зохион байгуулагдлаа.

Сайдын шуурхай хуралдаанд ХББОСЯ-ны газар, хэлтсийн дарга нар, “Төрийн орон сууцны корпораци” ТӨХХК, “Барилга хөгжлийн төв” ТӨҮГ, Ус хангамж, ариутгах татуургын ашиглалт, үйлчилгээг зохицуулах хороо зэрэг харьяа байгууллагын удирдлагууд оролцов. Шуурхай хуралдааныг ХББОСЯ-ны Төрийн нарийн бичгийн даргын албан үүргийг түр орлон гүйцэтгэгч С.Төмөрхүү удирдаж, яамны газар, хэлтэс, харъяа байгууллагууд, төслийн нэгжүүдийн хийж хэрэгжүүлсэн ажил, сайдын өмнөх хуралдаанаар өгсөн үүрэг даалгаварын биелэлтээ танилцууллаа.

Шуурхай хуралдаанд тавигдсан цаг үеийн мэдээллүүдтэй холбоотойгоор мөн ирэх өдрүүдэд хийгдэх ажлууд, томоохон төсөл хөтөлбөрүүдийг урагшлуулах ажлын хүрээнд сайд Ж.Батсуурь газар хэлтэс, харъяа байгууллагуудын удирдлагуудад дараах үүрэг чиглэлийг өглөө.

Үүнд:

• Барилгын салбарын ажилтны мэргэшлийн зэрэг горилох, сунгах шалгалтын үйл ажиллагаанд дотоод аудит оруулах;
• “Дулаан байшин” өдөрлөгийн хүрээнд Тэнхлэг зуучтай хамтран оролцож буй аж ахуйн нэгжүүдээс тооцоо судалгаа авах;
• Яамны стратеги төлөвлөгөөг яаралтай батлуулах;
• Монгол Улсад барилгын салбар үүсэж хөгжсөний 100 жилийн ойг тэмдэглэн өнгөрүүлэх бэлтгэл арга хэмжээг хангуулах үүрэг бүхий ажлын хэсэг байгуулагдсантай холбогдуулан дэд ажлын хэсгүүдийг бүх нэгжийн дарга нар ахлах;
• “Солонго 1, 2” төслийн орц гарц, Хөдөлгөөнт тоног төхөөрөмжийн гааль татварын төлбөрийн асуудлаар Батлан хамгаалах яамтай тохиролцож шийдвэрлэх, албан тоот хүргүүлэх төслийг бэлтгэх;
• “Эко Яармаг” гэр хорооллын дахин төлөвлөлтийн хүрээнд баригдах орон сууцны хорооллын гэрээний асуудлыг богино хугацаанд шийдвэрлэж, үргэлжлүүлэх эсэх талаар санал танилцуулах;
• Ирэх оныг “Боловсролыг дэмжих жил” болгон зарласантай холбогдуулан шинэ орон сууцны төслүүдийн сургууль цэцэрлэгийн барилгын асуудлыг холбогдох УИХ-ын гишүүд, нийслэл дүүргийн холбогдох хүмүүстэй шийдвэрлэж, улсын төсөвт суулгаж, магадлал хийх, холболтын ажлуудад онцгой анхаарч ажиллах;
• “Ногоон нуур-1008” айлын орон сууц барих төслийн асуудлыг НОСК-тай эцэслэн шийдвэрлэх, шаардлагатай бол ажлын хэсэг гаргаж ажиллах;
• Төрийн албан хаагчдыг орон сууцжуулах цогц хөтөлбөрийн 1-р үе шатыг аймаг сумдад хэрэгжүүлэх ажлын хүрээнд улсын төсвийн хөрөнгөөр хийгдэх төсөл арга хэмжээний тендер шалгаруулалтыг ойрын хугацаанд эцэслэх;
• Тусгай зөвшөөрлийг LICENCE.MN cистемд холбох ажлыг эрчимжүүлж, хүний оролцоогүй тусгай зөвшөөрөл олгож эхэлж буй үйл ажиллагааг олон нийт, аж ахуйн нэгжид танилцуулах ажлыг зохион байгуулах;
• Салбарын хуулийн шинэчилсэн найруулгын төслүүд дээр ажиллаж байгаа ажлын хэсгүүд ажлаа эрчимжүүлэх;
• Аймгуудын бохир ус цэвэрлэх байгууламжийг шинээр барих, өргөтгөх төслийн ажлыг эрчимжүүлэх, шаардлагатай орон нутагт газар дээр нь ажиллах, аймгийн Засаг даргад сайдын албан тоотыг явуулах зэрэг үүрэг чиглэлийг өглөө.