Нийслэлийн тээвэр, логистикийн хүчин чадлыг нэмэгдүүлэх зорилгоор Хүннү хотын нутагт тээвэр, логистикийн нэгдсэн төвийг шинээр байгуулахаар төлөвлөж, ажлын хүрээнд холбогдох төр, хувийн хэвшлийн байгууллагуудтай санал солилцох уулзалтуудыг зохион байгуулж байна.

Уг нэгдсэн төвийг нийт 1019 га талбайд барихаар төлөвлөсөн бөгөөд үүнээс 400 га газарт тээвэр, логистикийн бүс байгуулагдана. Энэ нь Улаанбаатар хотын авто болон төмөр замын тээвэр, бараа бүтээгдэхүүний нийлүүлэлтийн сүлжээг хялбаршуулж, логистикийн өртөг зардлыг бууруулах зорилготой юм.

Одоогийн байдлаар нийслэлд:

• Хувийн терминалтай 10 гаруй аж ахуйн нэгж

• Тээвэр, логистикийн үйлчилгээ эрхэлдэг 100 гаруй компани үйл ажиллагаа явуулж байна.

Шинэ логистикийн бүсийг байгуулахад эдгээр компаниудын санал, зөвлөмжийг тусгахын тулд Санхүү, эдийн засаг, хөгжлийн бүтээн байгуулалтыг эрчимжүүлэх төслүүдийг хэрэгжүүлэгч Л.Хосбаяраар ахлуулсан ажлын хэсэг ажиллаж байгаа бөгөөд энэ хүрээнд бүсийн төлөвлөлтийг оновчтой болгохоор зорьж байна.

Энэхүү нэгдсэн төв нь дотоодын ложистик үйлчилгээг төвлөрүүлж, олон улсын тээврийн сүлжээтэй уялдаа холбоог сайжруулах стратегийн ач холбогдолтой бүтээн байгуулалт болох юм.

Эх сурвалж: Нийслэлийн Санхүү, эдийн засаг, хөгжлийн газар