Чанартай, хүртээмжтэй дулаан хангамжийг бүрдүүлэх зорилгоор олон талт судалгаа, шинжилгээнд тулгуурлан боловсруулсан шинэ хуулийн төслийг танилцуулж эхэллээ. Уг хууль нь техникийн болон эрх зүйн зохицуулалтыг цогцоор нь хамарсан томоохон зохицуулалт бөгөөд иргэдэд илүү ойлгомжтой байдлаар хүргэх үүднээс хамгийн чухал 8 асуудлыг онцлон танилцуулсан юм.

1. Дулааныг хэмжих, хэмнэх асуудал

Дулааны хэрэглээг хэмжих нь хэмнэхийн үндэс гэдгийг онцолж, одоо хэрэглэгдэж буй янз бүрийн хэмжих нэгжүүд (м², м³, тоолуур г.м.) хэрэглэгч болон хангагч талд шударга бус нөхцөл байдал үүсгэж байгааг дурдлаа. Шийдэл болгон зөвхөн дулааны тоолуураар хэмждэг байхаар хуулийн төсөлд тусгасан. Ингэснээр:

• Иргэд хэрэглэсэн хэмжээнийхээ төлбөрийг төлнө.

• Хэрэглээгээ хянах, багасгах замаар хэмнэх боломж бүрдэнэ.

• Системийн нийт ачаалал буурна.

2. Дулаан хангамжид тэгш холбогдох нөхцөлийг хангах

Одоогийн нөхцөлд дулааны сүлжээнд холбогдох эрх нь дүрэм журмын түвшинд зохицуулагддаг учраас зөрчилдөөн, ойлгомжгүй байдал үүсдэг байна. Хуулийн төсөлд:

• Хэрэглэгч дулаанд холбогдох эрх нь хуулиар тодорхой зохицуулагдана.

• Хувийн хөрөнгөөр барьсан шугам сүлжээний өмчлөлийн асуудал, гуравдагч этгээд холбогдох нөхцөлийг нарийвчлан тусгажээ.

• Энэ нь хэрэглэгчийн эрхийг хамгаалж, өмчийг ашиглан зохисгүй байдлаар ашиг хонжоо хайх явдлыг хязгаарлах чухал алхам болох юм.

Хуулийн төсөл нь техникийн шийдэл, өмчлөлийн эрх, шударга хуваарилалт, эрчим хүчний үр ашиг зэрэг олон талт асуудлыг нэгтгэн шийдвэрлэхийг зорьж буй бөгөөд иргэдийн бодит хэрэглээ, хариуцлагатай хэрэглээг дэмжсэн оновчтой тогтолцоог бүрдүүлэхэд чиглэж байна.

Хуулийн бусад 6 асуудлын талаарх дэлгэрэнгүй мэдээллийг танилцуулсаар байх болно.

Эх сурвалж: Эрчим хүчний яам