Засгийн газрын өнөөдрийн хуралдаанаар “Хойд бүсийн хөгжлийг эрчимжүүлэх зарим арга хэмжээний тухай”, “Дөрвөн улирлын аялал жуулчлалыг хөгжүүлэх зарим арга хэмжээний тухай”, “Хойд бүсэд үйлдвэрлэл, технологийн паркийн хөгжлийг дэмжих зарим арга хэмжээний тухай” гэсэн гурван тогтоолыг баталж, цогц арга хэмжээнүүдийг хэрэгжүүлэхээр шийдвэрлэв.

Тогтоолын хүрээнд дараах ажлуудыг зохион байгуулахаар тусгажээ:

• Хөвсгөл аймагт 50 МВт-аас доошгүй хүчин чадалтай дулааны цахилгаан станцын техник, эдийн засгийн үндэслэлийг боловсруулна.

• Ханх-Хатгал, Жаргалант-Шинэ Идэр-Мөрөн, Булган-Мөрөн, Гурванбулаг-Элсэнтасархай, Сайхан-Баян-Агт чиглэлийн хатуу хучилттай замын төслийг эхлүүлэх, заримыг нь эрчимжүүлнэ.

• Дөрвөн улирлын аялал жуулчлалын бизнес эрхлэгчдэд 6 хувийн хүүтэй, 6 жил хүртэл хугацаатай хөнгөлөлттэй зээл олгоно.

• Булган, Хөвсгөл аймагт хөгжимт драмын театрын барилга барина.

• БНСУ-Мөрөн чиглэлд олон улсын шууд нислэг хийх нөхцөлийг бүрдүүлж, Мөрөн нисэх буудлыг өргөтгөнө.

• “Хойд бүсийн тээвэр, логистикийн төв”-ийн техник, эдийн засгийн үндэслэлийг боловсруулна.

• “Эрдэнэт шинжлэх ухаан, технологийн парк”-ийг гарааны бизнес дэмжих төв болгон хөгжүүлнэ.

• Ханх-Монд боомтыг өргөтгөж, шинэчлэнэ.

• Орон нутгийн хөгжлийн 6 төвийн инженерийн дэд бүтцийн төслийг төр-хувийн хэвшлийн түншлэлээр хэрэгжүүлнэ.

• Эрдэнэт хотод ШУТИС-ийн дэргэд “Сургалт-эрдэм шинжилгээ-үйлдвэрлэлийн цогцолбор” байгуулна.

• Хөдөлмөрийн зах зээл, бүсийн хөгжлийн чиг хандлагад нийцүүлэн мэргэжлийн боловсролын байгууллагуудыг төрөлжүүлнэ. Хөвсгөл аймагт салбар дундын дадлага, үйлдвэрлэлийн бааз байгуулах судалгаа хийнэ.

• “Эрдэнэт медикал” төрөлжсөн эмнэлгийг Эрүүл мэндийн яамны харьяанд шилжүүлж, бүсийн хавдрын оношилгоо, эмчилгээний төв болгоно.

• Булган аймгийн Нэгдсэн эмнэлгийн 100 ортой барилгад шаардагдах санхүүжилтийг шийдвэрлэнэ.

• Хөвсгөл нуур, Сэлэнгэ мөрний сав газрын экосистемийг хамгаалах зорилгоор судалгаа хийж, улсын тусгай хамгаалалтад авна.

• Монгол Улсын Ерөнхий сайд асан Агданбуугийн Амарын мэндэлсний 140 жилийн ойг 2026 онд тэмдэглэнэ.

• Хөвсгөл аймагт галд өртсөн “Шинэ Мөрөн” худалдааны төвийн хохирлыг арилгах, худалдаа үйлчилгээ эрхлэгчдэд 5.2 тэрбум төгрөгийн зээл олгохоор шийдвэрлэжээ.

Эдгээр арга хэмжээнүүд нь хойд бүсийн эдийн засаг, дэд бүтэц, аялал жуулчлал, боловсрол, эрүүл мэндийн салбарыг цогцоор нь хөгжүүлэх зорилготой юм.

Эх сурвалж: Монгол Улсын Засгийн газар