Нийслэл хотод хэрэгжүүлэх их багтаамжийн нийтийн тээврийн хэрэгсэл болох метро барих төслийн барилга угсралтын гүйцэтгэгчийг сонгон шалгаруулах нэгдүгээр шатны тендерийг энэ сарын 28-нд нээлээ. Тендерт Монгол, Солонгос, Англи, ОХУ, Франц, Энэтхэг, Хятад улсын нийт 27 аж ахуйн нэгж материалаа ирүүлсэн байна. Хуулийн дагуу дараагийн шатны тендерийг тавдугаар сарын 5-нд зарлахаар төлөвлөжээ.

“Улаанбаатар метро” төсөл нь Толгойтоос Амгалан чиглэлд үргэлжлэх бөгөөд нийт 19.4 км урттай, 15 өртөөтэй байхаар төлөвлөсөн байна. Цагт 17,206 зорчигч тээвэрлэх хүчин чадалтай байх бөгөөд зогсоол хоорондын зай 1.3 км байх аж. Толгойтоос Амгалан хүртэлх нийт аяллын хугацаа 31 минут 25 секунд байх бөгөөд төсөл амжилттай хэрэгжсэнээр нийслэлийн замын хөдөлгөөний дундаж хурд 40.4 хувиар нэмэгдэх тооцоо гарчээ.

“Улаанбаатар метро” төсөл нь 2025-2028 онд хэрэгжүүлэхээр төлөвлөсөн нийслэлийн 24 мега төслийн нэг юм.

Эх сурвалж: Нийслэлийн Засаг даргын Тамгын газар