Засгийн газрын Хэвлэл мэдээлэл, олон нийттэй харилцах газраас мэдээлснээр, 2025 онд улсын хэмжээнд ноолуур бэлтгэхэд шаардлагатай нэмэлт санхүүжилтийг вексель гарган бүрдүүлэх шийдвэрийг гаргалаа. Энэхүү алхам нь малчдын мөнгөн орлогыг тогтвортой байлгах, дотоодын ноолуурын үйлдвэрлэл, экспортын хэмжээг нэмэгдүүлэх зорилготой юм.

Монгол Улсын Ерөнхийлөгчийн санаачилсан “Цагаан алт” хөдөлгөөн болон ноолуурын бэлтгэлийн хүрээнд энэ онд 30 гаруй компани нийт 230 тэрбум төгрөгийн эргэлтийн хөрөнгийн зээл авч, 1525 тонн ноолуур бэлтгээд байна. 2025 онд 5600 тонн түүхий ноолуур бэлтгэх шаардлага бий болж байгаа бөгөөд энэ зорилтыг биелүүлэхэд вексель хэмээх санхүүгийн хэрэгслийг ашиглах боломжтой гэж үзэж, Монголбанканд вексель гаргах саналыг зөвлөсөн байна.

Дотоодын боловсруулах үйлдвэрүүд энэ жил:

• 3500 тонн самнасан ноолуур экспортолж,

• 2.5 сая ширхэг бэлэн бүтээгдэхүүн борлуулан,

• салбарын орлогыг 1.8 их наяд төгрөгт хүргэх,

• борлуулалтын орлогыг 600–700 тэрбум төгрөгөөр нэмэгдүүлэх зорилтыг тавин ажиллаж байгаа юм.

Уул уурхайн бус экспортын гол тулгуур салбар болох ноос, ноолуурын үйлдвэрлэл нь шат дараатайгаар дотооддоо боловсруулалтыг нэмэгдүүлэхийн сацуу, нэмүү өртөг шингэсэн бүтээгдэхүүний экспорт, олон улсын зах зээлд өрсөлдөх чадварыг дээшлүүлэх стратегийг хэрэгжүүлж байна.

Үйлдвэрлэл тасалдахгүй байж, ноолуурын үнэ ханш уналгүй, малчдын амжиргаа, орлого тогтвортой хадгалагдахад энэхүү санхүүгийн шийдэл бодит дэмжлэг үзүүлэх хэмээн холбогдох албаныхан онцолжээ.

Эх сурвалж: Засгийн газрын Хэвлэл мэдээлэл, олон нийттэй харилцах газар.