АНУ-ын Ерөнхийлөгч Дональд Трампын дэлхийн бараанд ногдуулах шинэ тарифын шийдвэрийн өмнө Америкийн жижиглэн худалдаачид швейцар цагнуудаа их хэмжээгээр нөөцөлсөн нь гуравдугаар сард Швейцарын АНУ руу хийсэн экспорт 13.7 хувиар өсөхөд шууд нөлөөлсөн байж болзошгүй хэмээн шинжээчид дүгнэж байна.

Швейцарын цаг үйлдвэрлэгчдийн холбооны мэдээлснээр, энэ өсөлт нь өмнөх сард 6.7 хувиар буурсан үзүүлэлтийг нөхөж, нийт экспортын хэмжээ 2.38 тэрбум швейцарь франк буюу 2.9 тэрбум ам.долларт хүрч, 1.5 хувийн нийт өсөлттэй гарчээ.

“Vontobel” фирмийн шинжээч Жан-Филипп Бертчи “АНУ руу хийсэн экспортын өсөлтөд татварын эрсдэлээс үүдсэн эмх замбараагүй байдал гол нөлөө үзүүлсэн” хэмээн тодотгожээ. Ерөнхийлөгч Трамп энэ сарын эхээр Швейцарын импортын бараанд 31 хувийн нэмэлт татвар ногдуулах төлөвлөгөөг зарласан бөгөөд энэ нь тус улсын цаг үйлдвэрлэлийн салбарт хүнд цохилт авчрах магадлалтайг мэргэжилтнүүд анхааруулж байна.

Хэдийгээр татварын үйлчлэх хугацааг 90 хоногоор хойшлуулсан ч, дөрөвдүгээр сарын 5-наас бүх импортод 10 хувийн суурь татвар мөрдөж эхэлсэн нь жижиглэн худалдаачдын бараа таталт, нийлүүлэлтийн хуваарьт эрс өөрчлөлт оруулсан байна.

“Kepler Cheuvreux” компанийн шинжээч Жон Коксын хэлснээр, экспортын огцом өсөлт нь татварын өмнөх нөөцлөлтийн илрэл бөгөөд швейцар үйлдвэрлэгчид томоохон ачааг АНУ руу урьдчилан илгээсэн нь тодорхой болж байна. АНУ нь 2021 оноос хойш Швейцар цагны хамгийн том экспортын зах зээл болж, Хонконг, Хятадыг гүйцэж түрүүлсэн билээ.

Эх сурвалж: AFP