Эдийн засаг, хөгжлийн яам (ЭЗХЯ) болон БНСУ-аас Монгол Улсад суугаа Элчин сайдын яам хамтран “Монгол-Солонгосын гарааны бизнес эрхлэгчдийн форум”-ыг амжилттай зохион байгууллаа. Энэхүү форум нь хоёр орны хооронд бизнес, хөрөнгө оруулалтын хамтын ажиллагааг өргөжүүлэх, ялангуяа инновацад суурилсан гарааны бизнесийн хөгжлийг дэмжих зорилготой байв.

Монгол Улсын Засгийн газар уул уурхайн бус экспортыг дэмжих бодлого баримтлан, бизнесийн орчныг сайжруулах, хувийн хэвшлийг дэмжих, гадаадын хөрөнгө оруулалтыг татах чиглэлээр ажиллаж байгаа. Форумын үеэр хоёр улсын гарааны бизнес эрхлэгчид туршлага солилцож, хөрөнгө оруулалт, санхүүжилт, экспортын талаар өргөн мэдээлэл сонссон байна.

ЭЗХЯ-ны Төрийн нарийн бичгийн дарга И.Батхүү форумын үеэр хэлэхдээ:

“БНСУ нь эдийн засгийн өсөлтийн гайхамшгийг бүтээсэн, томоохон корпорацуудаар баялаг улс. Өнөөдрийн уулзалтад 20 орчим амжилттай гарааны бизнес эрхлэгч оролцож байна. Манай залуус Солонгосын жишгээс суралцаж, өрсөлдөх чадвараа дээшлүүлэх нь чухал. Эрсдэл ихтэй гарааны бизнесийг төрийн бодлогоор дэмжих, тогтолцоог сайжруулах шаардлагатай” гэв.

БНСУ-ын талаас боловсрол, эрүүл мэнд, хүнс, хувцас загвар, барилга, хөнгөн үйлдвэрлэлийн чиглэлээр ажилладаг олон компани оролцсон бөгөөд Солонгосын гарааны бизнесүүдийг инкубатор төвүүд, татварын хөнгөлөлт, оффисын хямд түрээс, төсөлд зарцуулсан зардлын нөхөн олговор зэрэг бодлогоор дэмждэгийг онцоллоо.

Тухайлбал, “Ingsory” компанийн үүсгэн байгуулагч Канг Нам Күү хэлэхдээ:

“Бид боловсролын чиглэлээр ажиллаж, оюутнуудад зориулсан хичээллэх орчин бүхий кафе нээдэг. Солонгост ийм 700 орчим кафе бий. Шинэ санаа гаргасан бизнес эрхлэгчдэд төрөөс татварын хөнгөлөлт, зардлын нөхөн төлбөр зэрэг олон дэмжлэг үзүүлдэг. Монголын талаарх мэдээллийг энэ форумаар дамжуулан авна гэж найдаж байна” хэмээв.

Форумын хүрээнд мөн Монгол Улсын эдийн засгийн өнөөгийн нөхцөл байдал, “2024–2028 онд хэрэгжих 14 мега төсөл”, “Монгол-БНСУ эдийн засгийн түншлэлийн хэлэлцээр”-ийн талаарх дэлгэрэнгүй мэдээллийг оролцогчдод хүргэв.

Эх сурвалж: ЭЗХЯ, БНСУ-аас Монгол Улсад суугаа ЭСЯ.