Монголын Үндэсний Худалдаа Аж Үйлдвэрийн Танхимын Ерөнхийлөгч Л.Төр-Од ХБНГУ-ын Тюринген мужийн Эрфурт хотын Худалдаа аж үйлдвэрийн танхимын Ерөнхийлөгч Баухаус Дитер, Гүйцэтгэх захирал Фалбуш Томас тэргүүтэй төлөөлөгчидтэй уулзалт хийлээ. Уулзалтаар хоёр орны танхимуудын хамтын ажиллагааг бэхжүүлэх, цаашдын түншлэл, бизнесийн шинэ боломжуудын талаар санал солилцсон байна.

МҮХАҮТ-ын Ерөнхийлөгч уулзалтын үеэр тус танхимын үйл ажиллагаа, хууль эрх зүйн орчны шинэчлэл, аймгийн салбар танхимуудын чадавхийг нэмэгдүүлэх ажлуудыг танилцуулж, энэ хүрээнд мэргэжлийн боловсролын тогтолцоог сайжруулах, хүний нөөц бэлтгэхэд Германы туршлагыг нэвтрүүлэх сонирхолтой байгаагаа илэрхийлжээ. Мөн төслийн хүрээнд хамтран ажиллах хүсэлтээ тавьсан байна.

Харин Эрфурт хотын Худалдаа аж үйлдвэрийн танхимын Ерөнхийлөгч Баухаус Дитер, МҮХАҮТ-д мэргэжлийн боловсролын шинэ тогтолцоо нэвтрүүлэхэд дэмжлэг үзүүлэхэд бэлэн гэдгээ илэрхийлжээ. Тус улсад аж ахуйн нэгжүүд шаардлагатай мэргэжилтнээ захиалгаар сургаж, танхим нь 200-300 төрлийн сургалтыг санал болгодог аж. Сургалтыг зохион байгуулахдаа тухайн салбарын бүх хэрэгцээг судалж, шаардлагатай ур чадвар бүхий ажилтнуудыг бэлтгэж, албан ёсны үнэлгээ бүхий мэргэжилтэн болгон компаниудад хүлээлгэн өгдөг туршлагатай талаар мэдээлэл өгсөн байна.

Хоёр орны танхимуудын хамтын ажиллагаа ийнхүү мэргэжлийн боловсрол, хүний нөөцийн чиглэлд шинэ шатанд гарч, Монголд хөдөлмөрийн зах зээлийн хэрэгцээнд нийцсэн, чанартай ажиллах хүч бэлтгэх боломжийг бүрдүүлж байна.

Эх сурвалж: МҮХАҮТ