Монгол Улс, Евроазийн эдийн засгийн холбоотой чөлөөт худалдааны түр хэлэлцээрийн гурав дахь шатны хэлэлцээг хийж, Монгол Улсаас гарах 367 нэр төрлийн бараа бүтээгдэхүүнийг тус холбооны таван гишүүн оронд татваргүй нийлүүлэхээр тохиролцлоо. Тухайлбал, мах, махан бүтээгдэхүүн 29, арьс, ширэн бүтээгдэхүүн 60, ноос, ноолууран бүтээгдэхүүн 204, хөдөө аж ахуйн бусад бараа 73 зэрэг нэр төрлийн бүтээгдэхүүнүүд хөнгөлөлтөд хамрагдахаар болсон байна.

Энэхүү хэлэлцээгээр Монголын үйлдвэрлэгч, экспортлогчид жилд 16.6 сая ам.долларын гаалийн татвараас чөлөөлөгдөх боломж бүрдэж байгаа юм. Мөн 23 төрлийн барааг ЕАЭЗХ-ны зүгээс татварын хөнгөлөлтөөс хасуулах санал тавьснаас 8 нь бүрэн хасагдаж, 11-ийг харилцан тохирох нөхцөлтэйгөөр үлдээжээ.

Тэргүүн Шадар сайд Л.Гантөмөр энэ талаар мэдэгдэхдээ:

• Монгол Улс махны экспортыг бүх улирлаар тогтвортой хийдэг болох зорилт тавьсан.

• Хонь, ямааны махыг гаргаж чадахгүй байгаа асуудлыг шийдвэрлэж байна.

• Ноолуур, оёмол бүтээгдэхүүнийг бренд болгон Евроазийн зах зээлд гаргах боломж нээгдэж, экспортын орлого 500 сая ам.долларт хүрч чадна гэдгийг онцлов.

МУИС-ийн судалгааны багийн дүгнэлтээр, хэлэлцээрийн хүрээнд экспорт 3.8 хувь, импорт 4.7 хувиар өсөх төлөвтэй байна. Гэвч худалдааны балансын алдагдал улам нэмэгдэх магадлалтай тул дотоодын аж үйлдвэрийг хамгаалах, өрсөлдөх чадварыг сайжруулах шаардлагатайг профессор Н.Отгонсайхан анхаарууллаа.

Тэрбээр:

• Хэрэв үйлдвэрлэгчид гарал үүслийн нотолгоо, тээвэр, түүхий эдийн бүрдүүлэлтийг бүрэн хангаж чадахгүй бол татварын хөнгөлөлт үр дүнгүй болохыг сануулж,

• Үйлдвэрлэл эхлэх цагаасаа бүх шаардлагад нийцүүлэн ажиллахыг уриалсан юм.

Эх сурвалж: Zasag.mn, GoGo.mn, МУИС Бодлогын судалгааны лаборатори.