Мал эмнэлгийн ерөнхий газар, Дэлхийн мал амьтны эрүүл мэндийн байгууллага (WOAH), НҮБ-ын Хүнс, хөдөө аж ахуйн байгууллага (FAO)-тай хамтран бог малын мялзан өвчнийг устгах бүсийн хурлыг Улаанбаатар хотод зохион байгууллаа.

Бог малын мялзан өвчин нь дэлхий дахинд хөдөө аж ахуй, хүнсний аюулгүй байдал, эдийн засагт нөлөөлдөг ноцтой халдварт өвчин бөгөөд 2015 онд дэлхийн хэмжээнд уг өвчнийг бүрэн устгах стратеги батлагдсан. Энэхүү стратегийн хүрээнд 2030 он гэхэд өвчнийг бүрэн устгах, мал эмнэлгийн тогтолцоог бэхжүүлэх, халдварын тархалтыг хязгаарлах, хил дамнасан хамтын ажиллагааг хөгжүүлэх зорилтыг тавьжээ. Монгол Улс уг стратегийг дэмжиж, хэрэгжилтэд идэвхтэй оролцож байна.

Сүүлийн жилүүдэд манай улсад болон бүс нутгийн орнуудад уг өвчний дэгдэлт бүртгэгдсэн нь улс орнуудын уялдаа холбоог сайжруулах, мал эмнэлгийн үйлчилгээг чадавхжуулах зайлшгүй шаардлагыг харуулсан юм. Энэ хүрээнд хоёрдугаар үе шатандаа орсон дэлхийн хөтөлбөрийн шинэчилсэн тархвар зүйн системийн (эпидемиологийн) хандлагыг танилцуулж, уг өвчний хяналт, устгалд үр дүнтэй шийдлүүдийг хэлэлцлээ.

Мөн хурал нь Монгол Улсын мал эмнэлгийн байгууллагын үйл ажиллагаа, хяналт, вакцинжуулалтын зохион байгуулалтыг олон улсын жишигт нийцүүлэн хөгжүүлж байгааг харуулж, цаашдын экспортын боломжийг нэмэгдүүлэхэд эерэг үр нөлөөтэй болохыг ХХААХҮЯ мэдээлсэн байна.

Эх сурвалж: ХХААХҮЯ.