Төв аймгийн Сэргэлэн сумын нутаг дэвсгэр, Хөшигийн хөндийд байгуулах тээвэр логистикийн төв, терминал руу хүрэх шинэ төмөр замын барилгын ажлыг энэ сарын сүүлээр эхлүүлэхээр төлөвлөжээ. Энэ төмөр зам нь “Улаанбаатар төмөр зам” ХНН-ийн Багахангай өртөөнөөс салаалж, Олон улсын шинэ нисэх онгоцны буудлын урагшаа чиглэн баригдана.

Шинэ төмөр зам нь:

• 102 км урттай, дан замтай,

• 2 өртөө, 4 зөрлөгтэй,

• 2.5 км урт гүүрэн байгууламжтай байх бөгөөд

• барилгын ажлыг наймдугаар сарын 20-нд дуусгахаар төлөвлөжээ.

Зам, тээврийн сайд Б.Дэлгэрсайхан төмөр замын компанийн удирдлагуудтай уулзах үеэрээ Хөшигийн хөндийд 150 мянган хүн суурьших боломжтой эдийн засгийн чөлөөт бүс бүхий дагуул хот байгуулах зорилтыг танилцуулж, уг төмөр замын барилгын ажилд монгол инженерүүдийг түлхүү оролцуулж, дотоодын компаниудаа дайчлах нь чухал гэдгийг онцолсон байна.

Уулзалтад 100 гаруй мэргэжилтэн оролцож, авто зам, гүүрний чиглэлээр үйл ажиллагаа явуулдаг компаниудын төлөөлөл хамрагдсан бөгөөд төслийг богино хугацаанд чанартай гүйцэтгэх талаар санал солилцсон байна.

Эх сурвалж: Зам, тээврийн хөгжлийн яам