Засгийн газраас төмөр замын төрийн өмчит компаниудыг нэгтгэх шийдвэр гаргасантай холбогдуулан “Тавантолгой төмөр зам” ХХК болон “Монголын төмөр зам” ТӨХК-ийн ажилтнуудыг энэ долоо хоногоос эхлэн чөлөөлж, сонгон шалгаруулалтаар ажилд дахин томилох үйл явц эхэлж байна.

Шинэ бүтэц, орон тоо, ажлын хариуцлага, үр ашгийн тооцоо судалгааг холбогдох байгууллагууд хийж дуусгасан бөгөөд одоогийн байдлаар “Тавантолгой төмөр зам” ХХК-д 800, “Монголын төмөр зам” ТӨХК-д 600 гаруй хүн ажиллаж байна.

Зам, тээврийн сайд Б.Дэлгэрсайхан дээрх хоёр компанийн удирдлагууд болон ажилчидтай уулзах үеэрээ Засгийн газрын шийдвэрийн гол агуулгыг танилцуулсан. Тэрбээр төрийн өмчит төмөр замын компаниудын бүтээн байгуулалт, зарцуулсан хөрөнгө, ажил гүйцэтгэлийн үр дүн, эдийн засгийн өгөөж хангалтгүй байгаа тухай судалгаанд үндэслэн энэ арга хэмжээг авч буйг онцолсон. Мөн хувийн хэвшлийн ижил чиглэлийн компаниудын үйл ажиллагаатай харьцуулсан дүгнэлтээ танилцуулсан байна.

Шинэ менежмент, бүтээмж, үр ашгийг нэмэгдүүлэх зорилгоор төрийн өмчит төмөр замын компаниудын бүтэц, орон тоог нэгтгэж, шат дараатай сайжруулалтыг хэрэгжүүлж эхлээд байгаа талаар Зам, тээврийн яам мэдээллээ.

Эх сурвалж: ЗТЯ