НҮБ-ын Ерөнхий Ассамблей 2013 оноос эхлэн жил бүрийн гуравдугаар сарын 20-ны өдрийг "Дэлхийн аз жаргалын өдөр" болгон тэмдэглэхийг уриалж, улс орнуудыг боловсрол, гэгээрүүлэх хөтөлбөрөөр дамжуулан тэмдэглэх зөвлөмж өгчээ.
Энэхүү санаачилгыг Үндэстнээрээ аз жаргалын коэффициент хамгийн өндөр Бутаны Хаант Улсын иргэд анх гаргасан бөгөөд тухайн улс Үндэсний нийт аз жаргалын индекс (GNH)-ээр хөгжлийн түвшнээ үнэлдэг гэдгээрээ онцлог.
Монгол Улс Аз жаргалын индексээр 77 дугаарт бичигдэв
Дэлхийн улс орнуудын аз жаргалын түвшинг судалдаг хамгийн түгээмэл арга нь Аз жаргалын индекс юм. Монгол Улс өнгөрсөн жилийн энэхүү индексээр 143 орноос 77 дугаарт эрэмбэлэгдсэн байна.
Аз жаргалын индексийг тодорхойлоход дараах хүчин зүйлсийг харгалзан үздэг:
- Оршин суугчдын эрүүл мэнд, дундаж наслалт
- Экологийн нөхцөл
- Амьжиргааны түвшин, эд баялаг
- Хувь хүний эрх чөлөө, нийгмийн халамж
Аз жаргалын тодорхойлолт нь хувь хүн бүрт харилцан адилгүй байдаг ч сэтгэл ханамж, тайван байдал, эд баялаг, хувь хүний амжилт, нийгмийн оролцоо зэрэг нь аз жаргалтай амьдралд хүрэх чухал үзүүлэлтүүд гэж судлаачид үздэг.
