Үндэсний статистикийн хорооны мэдээлснээр, 2024 оны эхний хоёр сарын урьдчилсан гүйцэтгэлээр улсын нэгдсэн төсвийн орлого, тусламжийн хэмжээ 4.1 их наяд төгрөгт хүрсэн нь өмнөх оны мөн үеийнхээс 1.2 их наяд төгрөгөөр (22.9 хувь) буурсан байна. Тэнцвэржүүлсэн орлого, тусламжийн хэмжээ 4 их наяд төгрөг болж, 1.1 их наяд төгрөгөөр (21.1 хувь) багасжээ.
Нийт зарлага, эргэж төлөх цэвэр зээлийн хэмжээ 4.6 их наяд төгрөгт хүрч, тэнцвэржүүлсэн тэнцэл 565.8 тэрбум төгрөгийн алдагдалтай гарсан байна.
Татварын орлогын бууралт
Энэ оны эхний хоёр сард татварын орлого 3.8 их наяд төгрөг болж, өмнөх оны мөн үеийнхээс 1.1 их наяд төгрөгөөр (22.9 хувь) буурсан байна. Үүнд голлон нөлөөлсөн хүчин зүйлс:
- Орлогын албан татвар – 591.5 тэрбум төгрөгөөр (30.3 хувь) буурсан
- Нэмэгдсэн өртгийн албан татвар – 119.8 тэрбум төгрөгөөр (13.9 хувь) буурсан
- Ашигт малтмалын нөөц ашигласны төлбөр – 542.2 тэрбум төгрөгөөр (65.5 хувь) буурсан
Харин дараах орлогын эх үүсвэрүүд өссөн байна:
- Нийгмийн даатгалын орлого – 195.5 тэрбум төгрөгөөр (34.8 хувь) өссөн
- Гадаад үйл ажиллагааны орлого – 32.5 тэрбум төгрөгөөр (13.9 хувь) өссөн
Татварын орлогын бүтцэд:
- Орлогын албан татвар – 36.1%
- Нэмэгдсэн өртгийн албан татвар – 19.7%
- Нийгмийн даатгалын орлого – 20.1%
- Гадаад үйл ажиллагааны орлого – 7.1%
- Онцгой албан татвар – 5.5%
- Бусад төрлийн татвар, төлбөр, хураамж – 11.5% тус тус эзэлжээ.
Зарлагын өсөлт, хөрөнгийн зардлын бууралт
2024 оны эхний хоёр сард нийт зарлага, эргэж төлөх цэвэр зээлийн хэмжээ 4.6 их наяд төгрөгт хүрч, өмнөх оны мөн үеийнхээс 830.4 тэрбум төгрөгөөр (22.1 хувь) өссөн байна. Зарлага өсөхөд:
- Бараа, үйлчилгээний зардал – 348.5 тэрбум төгрөгөөр (31.1 хувь) нэмэгдсэн
- Урсгал шилжүүлэг – 507.7 тэрбум төгрөгөөр (32.5 хувь) өссөн
Харин хөрөнгийн зардал 137.4 тэрбум төгрөгөөр (21.3 хувь) буурчээ. Үүнд:
- Барилга байгууламжийн зардал – 86.7 тэрбум төгрөгөөр (17.1 хувь) буурсан
- Тоног төхөөрөмжийн зардал – 62.7 тэрбум төгрөгөөр (62.9 хувь) буурсан
- Бусад хөрөнгийн зардал – 10.6 тэрбум төгрөгөөр (32.3 хувь) нэмэгдсэн
