Санхүүгийн зохицуулах хорооны тусгай зөвшөөрөлтэй Үл хөдлөх эд хөрөнгө зуучлал (ҮХЭХЗ)-ын 312 байгууллага 2024 онд үйл ажиллагаа явуулсан нь өнгөрсөн оноос дөрвөөр нэмэгдсэн үзүүлэлт болжээ.

Тус байгууллагуудын тайлангаар нийтийн орон сууцны 1 м.кв-ын дундаж үнэ 5.9 сая төгрөг байна. Худалдан, худалдан авсан үл хөдлөх хөрөнгийн нийт талбайн:

• 54 хувийг газар,
• 41.8 хувийг орон сууц,
• 3.4 хувийг арилжааны зориулалттай үл хөдлөх хөрөнгө,
• 0.3 хувийг үйлдвэрлэлийн зориулалттай үл хөдлөх хөрөнгө эзэлжээ.

ҮХЭХЗ-ын байгууллагууд 12,426 хэлцлээр 1,797.3 мянган м.кв талбай, 2,850.1 тэрбум төгрөгийн үнэ бүхий үл хөдлөх хөрөнгийг зуучлан худалдаж, шилжүүлсэн нь 2023 оныхоос талбайн хэмжээ 12.5 хувиар, үнийн дүн 24.6 хувиар өссөн үзүүлэлт болсон байна.

Хэмжээний ангиллаар:

• 50 м.кв хүртэлх талбай – 508.5 тэрбум төгрөг,
• 51-100 м.кв хүртэл – 760.1 тэрбум төгрөг,
• 101-200 м.кв хүртэл – 735.2 тэрбум төгрөг,
• 201 м.кв-аас дээш – 846.3 тэрбум төгрөгийн үл хөдлөх хөрөнгийн хэлцэл хийгджээ.

Түрээсийн зах зээл
ҮХЭХЗ-ын байгууллагууд 8,376 хэлцлээр 659.1 мянган м.кв талбай, 234.9 тэрбум төгрөгийн үл хөдлөх хөрөнгийг түрээслүүлсэн нь өнгөрсөн оноос түрээсийн талбай 9.9 хувиар, үнийн дүн 31.9 хувиар нэмэгдсэн үзүүлэлт болжээ.

Түрээслэгдсэн үл хөдлөх хөрөнгийн үнийн дүн:

• 50 м.кв хүртэл – 51.9 тэрбум төгрөг,
• 51-100 м.кв хүртэл – 51.3 тэрбум төгрөг,
• 101-200 м.кв хүртэл – 66.1 тэрбум төгрөг,
• 201 м.кв-аас дээш – 65.5 тэрбум төгрөг.

Санхүүгийн үзүүлэлтүүд
2024 онд үл хөдлөх хөрөнгө зуучлалын салбар 193.2 тэрбум төгрөгийн орлого, 183.6 тэрбум төгрөгийн зардалтай ажиллаж, 9.6 тэрбум төгрөгийн цэвэр ашиг олжээ.

• 101 байгууллага ашигтай (16.7 тэрбум төгрөгийн ашиг),
• 122 байгууллага алдагдалтай (7 тэрбум төгрөгийн алдагдал),
• 89 байгууллага ашиг, алдагдалгүй гарсан байна.

Салбарын нийт хөрөнгө 224.6 тэрбум төгрөг бөгөөд:

• 169.9 тэрбум төгрөг нь эргэлтийн хөрөнгө,
• 54.8 тэрбум төгрөг нь эргэлтийн бус хөрөнгө,
• 181.2 тэрбум төгрөг нь өр төлбөр,
• 43.4 тэрбум төгрөг нь эздийн өмч эзэлжээ.

Салбарын нийт хөрөнгийн 77 хувийг 15 компани, 94 хувийг 60 компани бүрдүүлсэн бөгөөд нэг байгууллага дунджаар 1 брокер, 4 агенттай ажилласан байна.

Хувьцаа эзэмшигчдийн бүтэц:

• 93.8 хувь – хувь хүмүүс,
• 3.9 хувь – хуулийн этгээдүүд,
• 2.4 хувь – хувь хүн, хуулийн этгээд хамтран эзэмшдэг бөгөөд хувь нийлүүлсэн хөрөнгө 7.3 тэрбум төгрөг-т хүрчээ.

Эх сурвалж: Санхүүгийн зохицуулах хороо