Дарханы Хонгор суманд байгуулагдах Ган хайлуулах цогцолбор үйлдвэр нь нойтон баяжмалын үйлдвэр, хорголжийн үйлдвэр, аргалжийн үйлдвэр, гангийн үйлдвэр болон дагалдах үйлдвэрүүдээс бүрдэх бөгөөд уул уурхайн олборлолт, баяжуулалт, боловсруулалтыг нэг дор хийх цогцолбор болох юм.

Үйлдвэрийн ач холбогдол

• Жилд 1 сая тонн ган үйлдвэрлэж, дотоодын хэрэгцээг бүрэн хангана.
• 1200 орчим шинэ ажлын байр бий болно.
• Дарханы төмөрлөгийн үйлдвэр одоогоор жилийн 100 мянган тонн ган бэлдэц үйлдвэрлэдэг бөгөөд хаягдал төмөр боловсруулж, өндөр үнээр ган бүтээгдэхүүн импортолж байгаа нь сул талтай.
• Гангийн цогцолбор байгуулагдсанаар орон нутгийн төсөвт төвлөрөх орлого 10 дахин нэмэгдэж, Үндэсний баялгийн санд жилийн 250 тэрбум төгрөг төвлөрөх тооцоотой.

Гадаад худалдаанд үзүүлэх нөлөө

Монгол Улс жилд 860 сая ам.долларын ган бүтээгдэхүүн импортолж байгаа нь эдийн засгийн алдагдалтай нөхцөл үүсгэж байна. Гангийн бэлдэц үйлдвэрлэснээр дотоодын үйлдвэрлэгчид хямд үнэтэй түүхий эдээр бүтээгдэхүүн үйлдвэрлэх боломжтой болж, гадагшаа урсах валютын урсгалыг багасгана.

Төсөл хэрэгжүүлэх төлөвлөгөө

• Гангийн үйлдвэрлэлийг Үйлдвэр технологийн паркийн загвараар хөгжүүлнэ.
• Газрын асуудлыг Дархан-Уул аймгийн удирдлагуудтай хамтран шийдвэрлэнэ.
• ТЭЗҮ боловсруулж, санхүүжилтийн эх үүсвэрийг хувийн хэвшлийн түншлэл эсвэл олон улсын хөрөнгө оруулалтаар шийдвэрлэх хувилбар судална.

Дарханы төмөрлөгийн үйлдвэрийг 2022 оны 4-р сард төр буцаан авч, менежментийг шинэчилснээс хойш 2024 онд 291.7 тэрбум төгрөгийн орлого олж, 51.9 тэрбум төгрөгийн ашигтай ажилласан байна. Үүнээс улсын төсөвт 55.6 тэрбум төгрөг, Дархан-Уул аймгийн төсөвт 31.5 тэрбум төгрөг, Үндэсний баялгийн санд 13.6 тэрбум төгрөг төвлөрүүлжээ.

ЗГХЭГ-ын дарга уг цогцолборын ажлыг эрчимжүүлэх, шийдлээ хүлээсэн ажлуудыг урагшлуулах чиглэлээр холбогдох албаныханд үүрэг өгсөн байна.

Эх сурвалж: Засгийн газрын хэрэг эрхлэх газар.