“Эрдэнэс Тавантолгой” хувьцаат компани 1072 хувьцаа эзэмшигч иргэдэд ногдол ашиг олгох шийдвэрийг ТУЗ-ийн хурлаар гаргалаа.
Ногдол ашгийг хоёр хэсэгт хуваан олгох бөгөөд эхний 100 мянган төгрөгийг энэ сарын 28-нд, үлдсэн 93 мянган төгрөгийг дөрөвдүгээр сард иргэдийн дансанд шилжүүлэхээр болжээ.
Тус компанийн гүйцэтгэх захирлын түр орлон гүйцэтгэгч Х.Мөнхжаргалын мэдээлснээр, 2024 оны санхүүгийн балансаар 1072 хувьцаатай иргэн 350 мянга орчим төгрөгийн ногдол ашиг хүртэхээр болсон байна. Үүнээс 130 мянган төгрөгийг өнгөрсөн арванхоёрдугаар сард урьдчилан олгосон бөгөөд үлдсэн 200 мянга орчим төгрөгийг дээрх байдлаар хувааж өгөх аж.
Иргэдийн ногдол ашигт нийт 1.1 их наяд төгрөг зарцуулах бол төрийн эзэмшлийн хувьцааны ногдол ашигт 2.8 их наяд төгрөг хуваарилахаар болсон байна. Ингэснээр компанийн 4.5 их наяд төгрөгийн цэвэр ашгийн 86 орчим хувийг ногдол ашигт олгохоор тооцжээ.
