Нийслэлийн удирдах ажилтнуудын шуурхай зөвлөгөөнөөр Бөөрөлжүүтийн цахилгаан станцын II блок болон Төв аймгийн Баян суманд баригдаж буй цахилгаан станцын ажлын явцыг танилцууллаа.
Төв аймгийн Баянгийн цахилгаан станц
Эрчим хүчний төслийн нэгжийн захирал Р.Дагдан мэдээлэхдээ, Төв аймгийн Баян сум болон нийслэлийн Багахангай дүүргийн заагт хоёр блок бүхий 660 МВт хүчин чадалтай цахилгаан станц барихаар төлөвлөж буйг онцоллоо. Тус станцын талбай Баян сумаас гурван км, Багахангай дүүргийн төвөөс хоёр км-ийн зайд байрлах юм.
Одоогоор төслийн ТЭЗҮ, урьдчилсан судалгаа хийгдэж, PPA гэрээ байгуулагдан, барилга угсралтын ажлыг эхлүүлэх нөхцөл бүрдсэн байна. Нарийвчилсан зураг төсөл боловсруулах, батлуулах ажил төлөвлөгөөний дагуу үргэлжилж байна.
Бөөрөлжүүтийн цахилгаан станцын II блок
Тус станцын II блокийн барилга угсралтын ажил 2023 онд эхэлсэн бөгөөд өдгөө:
- Зуухны угсралт 40 хувь,
- Барилга угсралтын нийт гүйцэтгэл 25 хувь,
- Зуухны болон үндсэн барилгын битүүлэлтийн ажил бүрэн дууссан байна.
II блокийг 2024 оны арваннэгдүгээр сард ашиглалтад оруулахаар төлөвлөжээ.
Төвийн бүсийн эрчим хүчний сүлжээний шинэчлэл
Мөн энэ онд төвийн бүсийн эрчим хүчний системийн тойрог сүлжээг бий болгох зорилгоор Сэргэлэн чиглэлд 84.5 км урттай, 220 кВ-ын цахилгаан дамжуулах агаарын шугамын тоног төхөөрөмж үйлдвэрлэлийн ажил эхэлнэ. Үүнээс гадна, Бөөрөлжүүтийн цахилгаан станцын III блокийн суурийн ажлыг эхлүүлэх, ногоон байгууламж, тохижилтын ажлыг хийхээр төлөвлөжээ.
