Бүгд Найрамдах Социалист Вьетнам улсын барилгын салбарын бизнес эрхлэгчдийн төлөөлөл хоёрдугаар сарын 6-ны өдөр “Улаанбаатар орон сууцжуулалт” ХХК-ийн үйл ажиллагаатай танилцаж, хот төлөвлөлт, орон сууцжуулалтын бодлогын талаар санал солилцлоо.
Уулзалтын үеэр дараах асуудлуудыг онцлов:
- “Hunnu Smart City” болон Сэлбэ дэд төвийг түшиглэсэн орон сууцны төлөвлөлт
- Монгол Улсын орон сууцны бодлогын шинэчлэл, дэд бүтцийн төслүүд
- Сэргээгдэх эрчим хүчний хөрөнгө оруулалтын боломжууд
Орон сууцжуулалтын бодлого ба төлөвлөгөө
НИТХ-ын төлөөлөгч, “Улаанбаатар орон сууцжуулалт” ХХК-ийн гүйцэтгэх захирал З.Төмөртөмөө:
“Монгол Улсын Засгийн газар 2025 оныг Улаанбаатар хотыг дэмжих жил болгон зарласан. 14 мега төслийн дийлэнх нь нийслэлд хэрэгжинэ. Төвлөрлийг сааруулах зорилгоор дагуул хотуудын дэд бүтцийн ажлуудыг эрчимжүүлж, хөрөнгө оруулалт татах бодлого баримталж байна.”
Нийслэлийн орон сууцны бодлогын газрын дарга Г.Ганхүү:
“Одоогийн байдлаар Улаанбаатар хотын хүн амын 56% нь инженерийн шугам сүлжээнд холбогдсон орон сууцанд амьдарч байгаа бол 44% нь гэр хороололд амьдарч байна. 2040 он хүртэлх хөгжлийн ерөнхий төлөвлөгөөг боловсруулж, нийт хүн амын 84%-ийг орон сууцанд, 16%-ийг амины орон сууцанд шилжүүлэх бодлого баримталж байна.”
Вьетнамын ROX группын төлөвлөгөө, санал
ROX группын ТУЗ-ийн дарга Nguyen Thi Nguyet Huong:
“Монгол, Вьетнам хоёр улс 70 гаруй жилийн хамтын ажиллагааны түүхтэй. Бид Монголын барилгын салбарт хөрөнгө оруулалт хийх боломжийг судалж, орон сууцжуулалт, сэргээгдэх эрчим хүчний төслүүдэд хамтран ажиллах сонирхолтой байна. Бидний баг Монгол Улсын эрчим хүчний сайдтай уулзаж, нарны цахилгаан станцын төсөл танилцуулж байна.”
Хүннү хотын төлөвлөлт ба дагуул хотууд
Хүннү хотын бүтээн байгуулалтын төлөөлөгч М.Батбаяр:
“2050 он гэхэд Монгол Улс Зүүн хойд Азийн зорчигч, ачаа тээврийн төв болох зорилт тавьсан. Хүннү хот нь агаарын тээвэр, төмөр зам, авто тээврийн зангилаа болох бөгөөд төрийн захиргааны байгууллага, тээвэр логистик, эдийн засгийн чөлөөт бүс байгуулагдахаар төлөвлөгдөж байна.”
Хотжилтын хурдац ба тулгамдаж буй асуудлууд
НОСК-ийн Гүйцэтгэх захирал М.Говьсайхан:
“Монгол Улс нүүдлийн аж ахуйгаас суурин соёлд шилжих үйл явц маш эрчимтэй өрнөж байна. Хүн амын 70% нь Улаанбаатарт төвлөрсөн. Үүнээс үүдэн дэлхийн томоохон хотуудын тулгарсан төвлөрлийн асуудлыг бид ч мөн даван туулж байна. Орон сууцжуулалтын ажлыг эрчимжүүлэхийн тулд олон улсын байгууллагууд, барилгын компаниудтай хамтран ажиллах нь чухал байна.”
“Улаанбаатар орон сууцжуулалт” ХХК
Энэхүү уулзалт нь Монголын барилгын салбар, хот төлөвлөлт, орон сууцны бодлогыг олон улсын түвшинд хөгжүүлэх, хөрөнгө оруулалт татах боломжийг нээж буй чухал алхам болж байна.
