2025 онд зах зээлд мэдэгдэхүйц хэлбэлзэл гаргаж, хөрөнгө оруулагчдад гайхал төрүүлэхүйц олон хүчин зүйл бий гэж Bank of America (BofA) банкны стратегичид үзжээ. Тус банк үйлчлүүлэгчдэдээ зориулан, заавал бодит болно гэхээргүй ч боломжийн байх магадлалтай долоон үйл явдлын жагсаалтыг гаргажээ гэж Business Insider мэдээлэв.

1. S&P 500 индекс гурав дахь жилдээ 20%-иар өсөх магадлалтай

Уолл-стрит 2025 онд S&P 500 индекс 8%-иар өсөж, 6539 нэгжид хүрэх төлөвтэй гэж даруухан таамаг гаргажээ. Гэвч BofA-ийн шинжээчид илүү өөдрөг таамаг дэвшүүлэн, индексийг 6666 нэгжид хүрч, гурав дахь жилдээ дараалан 20%-иар нэмэгдэнэ гэж үзэж байна.

2. Дональд Трампын тарифын бодлогын эерэг нөлөө

Дональд Трампын худалдааны тарифын бодлого АНУ-ын худалдааны тэнцвэрийн алдагдлыг бууруулж, үйлдвэржилтэд эерэг нөлөө үзүүлнэ гэж банкны шинжээчид үзжээ. Энэ нь үйлдвэрлэлийн өсөлтийг дэмжиж, эдийн засгийн хувьд нааштай өөрчлөлт авчирна.

3. Хөрөнгө оруулалтын хөөрөл

Дональд Трамп төрийн удирдлагын үр ашгийг нэмэгдүүлэх зорилгоор Илон Маск, Вивек Рамасвами нарыг оролцуулан шинэ алба байгуулах магадлалтай. Энэ шийдвэр нь компаниудын хөрөнгө оруулалтын зардлыг нэмэгдүүлнэ гэж үзэж байна.

4. Хиймэл оюун ухааны сургалтын мэдээллийн хомсдол

Хиймэл оюун ухааны сургалтын өгөгдлийн нөөц оны сүүлээр багасна гэж BofA таамаглажээ. Үүний улмаас технологийн компаниудын ашиг хөрөнгө оруулагчдын хүлээлтэд хүрэхгүй, улмаар зах зээлийн хөөрөл буурна.

5. Облигацийн зах зээлийн эрсдэл

АНУ-ын засгийн газрын өрийн үнэт цааснуудаас хөрөнгө оруулагчид татгалзаж, энэ нь зах зээлд үймээн үүсгэж магадгүй. Трампын засаглалын эхний 100 хоногт засгийн газрын өр $40 их наяд хүрч, хөрөнгө оруулагчдын санааг зовоож байна.

6. Интернетийн даяарчлалын тасалдал

Усан доорх кабелийн гэмтэл дэлхий даяарх интернетийн ажиллагаанд ноцтой асуудал үүсгэж болзошгүйг банкны шинжээчид анхааруулжээ. Эдгээр кабелиар өдөрт $10 их наядын санхүүгийн гүйлгээ дамждаг бөгөөд гэмтэл нь дижитал дэд бүтцэд ихээхэн хохирол учруулна.

7. Цахилгааны тасалдал ба АНУ-ын эдийн засгийн хохирол

АНУ-ын хуучирсан цахилгаан сүлжээ нь ирэх арван жилд дөрвөн удаагийн томоохон тасалдлыг давж магадгүй бөгөөд энэ нь нийт $600 тэрбумын хохирол учруулна гэж BofA үзжээ.

Эх сурвалж: Office Life