Өчигдөр Төрийн ордонд хуралдсан МАН-ын бүлгийн хурлаар утааны асуудлыг авч хэлэлцжээ. Бүлгийн дарга Д.Тогтохсүрэн утааг бууруулахад зориулж 28,5 тэрбум төгрөгийг нийслэлийн төсөвт шилжүүлсэн гэв. БОАЖЯ, ЭХЯ-ыг нэгтгэсэн Агаарын бохирдлыг бууруулах Үндэсний хороог татан буулгаснаар БОАЖ-ын сайдын багцад байсан 28,5 тэрбумыг нийслэлийн төсөв рүү шилжүүлж байгаа юм байна.
Шударгаар хэлбэл, цаашид агаарын бохирдолтой тэмцэх нь ямар ч үр дүнгүй, “Кихот ноён салхин тээрэмтэй тэмцсэн”-ээс ялгаагүй боллоо гэдгийг эрх баригчид хүлээн зөвшөөрсөн бололтой.
Харин хотын дарга Х.Нямбаатар нийслэлийн агаарын бохирдлыг бууруулахад зориулсан дээрх төсвөөр 80 мянган өрхөд “утаагүй” буюу давхар шүүлтүүртэй зуух тараахаар болсныг хотын даргын орлогч О.Номичимэг намын бүлгийн хурлын дараа мэдээлэв.
Мөн өнгөрсөн удаад олон нийтийн дунд маргаан, шүүмжлэл дэгдээгээд байсан “түгжрэлийг бууруулахын тулд төлбөртэй бүс бий болгох” асуудлаар хотын дарга шийдвэрээ нэгэнт гаргасан бололтой юм. Төлбөртэй бүсүүдийн байршлыг гаргаад, төлбөргүй зогсоол хийх ажил хэдийн эхэлсэн, төсөв мөнгө нь хуваарилагдаад явж байгаа юм байна.
Ингэхэд түгжрэл нэгдүгээр асуудал биш болсон гэдгийг Х.Нямбаатар дарга одоо хэр нь мэдээгүй яваа нь гачлантай. Хэдэн хүн үхэж байж мэдэх ёстойг бүү мэд. Эрх биш маньтайгаа нэг агаараар амьсгалдаг байлгүй гэтэл үгүй бололтой. Мордохын хазгай гэдэг л болж байна.
Хазгай гишгэсэн нь ч Ерөнхий сайд Л.Оюун-Эрдэнэ Х.Нямбаатарыг сайдын суудлаас буулгаж, хотын даргаар томилсон үеэс эхэлсэн юм. Анхнаасаа “Дунд шатны авилгыг буулуулах” гэдэг “том” даалгавартай ирсэн хотын даргад агаарын бохирдол, түгжрэлийг бууруулах гэх мэт “жижиг” асуудлуудаар ямар ч ойлголт, бодлого, төлөвлөлт байсангүй. Ядаж утаагүй тулш чинь яагаад утаа үйлдвэрлээд эхэлчихэв? Иргэд яагаад бөөн бөөнөөрөө угаартаж үхээд байна вэ? гэдэгт хариулт байхгүй, судалгаа шинжилгээ хийгээгүй. Өмнөх хорин жил ярьсан, давтсан “зуух тараах” тухай л ярьж байна. Ядаж цахилгаанаар халаах, тарифыг хямдруулах гээд бэлэн жор байхад үргэлжлүүлээд явж болно оо доо.
Товчхондоо хот гэдэг айл МАН-ын дарга нарын цаг тоололд үрэгдээд дууслаа. 2016 оны сонгуулиас хойш хоёр бүрэн эрхийн хугацаанд зургаа дахь даргынхаа нүүрийг үзэв. Д.Сумъяабазарын цаг тоолол дуусч, Х.Нямбаатарынх эхэллээ. Шинэ тоолол эхлэх бүрд бидний амьдрал 20, 20 жилээр ухарч байна. Эрүүл мэнд, амь насаараа төлбөрийг нь төлж байна.
Б.ЗАЯА
