Сайжруулсан шахмал түлшний зуух, яндан, пийшингийн стандарт буюу галлагааны үед заавал анхаарах ёстой зөвлөмжийг хүргэж байна.

Доороос нь өрдөж галладаг зуух галлах ЗӨВЛӨМЖ:

• Галын хотолд буюу ул ширмэн дээр 500-1,000 грамм орчим хуурай модыг зэрэглэн өрж асаан, мод гүйцэд шатаж эхлэх үед дээр нь 2-3 килограмм бүхэл буюу бутраагүй түлшийг хийнэ.

• Түлш шатаж эхэлснээс хойш хагас цагийн дараа галын хотлын эзлэхүүний 85 хувиас ихгүй байхаар түлшээр дахин цэнэглэнэ.

• Сайжруулсан шахмал түлшээ дахин цэнэглэсний дараа ойролцоогоор нэг цагийн хугацаанд агаар өгөлтийн хэмжээг өөрчлөхгүй байх хэрэгтэй.

• Тогтсон хугацаа өнгөрсний дараа агаар өгөлтийг хэрэглэгч өөрийн шаардлагад нийцүүлэн галлагааг үргэлжлүүлнэ.

• Түлшний хэмжээ буурах үед түлш унтрахаас өмнө буюу дөлтэй үед түлшээ нэмэх шаардлагатай.

Дээрээс нь ноцоож галладаг зуух галлах ЗӨВЛӨМЖ:

• Сайжруулсан шахмал түлшээ зуухны хотлын эзлэхүүний 85 хувиас ихгүй байхаар тооцож зөөлөн хийж дээр нь 500-1,000 грамм орчим хуурай мод зэрэглэн өрж зөвхөн дээр нь галлана.

• Түлш ноцоох явцад дээд доод агаарын хаалтыг нээсэн байх шаардлагатай. Дээд агаарын хаалтаар гал хэрхэн асаж байгааг харж хянах боломжтой.

• Түлш асаж эхэлсний дараа дээд хаалтыг хаах, доод агаарын хаалтаар түлшний шаталтыг удирдаж болно.

• Түлш бүрэн шатаж дууссаны дараа галлагааг дахин дээрээс нь хийнэ.

• Түлш шатах явцад агаар өгөлтөөс бусад тохиолдолд зуухны ширэм, ам зэргийг хаалттай байлгах хэрэгтэй

• Түлш шатаж дууссаны дараа үнсийг гаргаж үнсний сав болон хүхээг сайтар цэвэрлэх шаардлагатай.