Хатуу хөл хориг цуцалсан Засгийн газар, УОК-ийн шийдвэр долоохон хоногийн настай байж. Троллууд нь “Хэлээгүй юу, хөл хориог цуцалснаас халдвар тархав” хэмээн бичиж байна. Харин халдвар тархсан нөхцөл байдал арай өөрөөр харагдаад байна. Өөрөөр хэлбэл халдвар эмч, эмнэлгийн байгууллагуудаас голомтлон тархаж эхэллээ. Баянзүрх дүүргийн эмнэлгээс тархсан халдвар гэхэд дүүргийн бүх хороодод бүртгэгдчихлээ. 300 мянган хүн амтай дүүрэг тэр чигээрээ цагийг нь тохируулсан “тэсрэх бөмбөг” болчихлоо. ХӨСҮТ-ийн гурван тасагт халдвар гарсныг Эрүүл мэндийн сайд нь баталжээ. Одоо бусад дүүргүүдээс хэзээ сонсогдохыг тааварлахад ч бэрх.

Ингээд Ерөнхий сайд, УОК-ийн даргын өөрсдийнх нь хэлснээр “бүтэн жил бэлдсэн, хийсэн” ажлын үр дүн, боловсруулсан төлөвлөгөө ганцхан өдрийн "салхинд" талаар нэг тараад уначихлаа. Халдварыг амжилттай хумилаа гэсэн нь ч шал худлаа болов. Халдварын тархалт хил хязгаараа алдлаа гэсэн үг. Маргаашнаас өндөржүүлсөн бэлэн байдлын зэрэглэлийг ахиулж, хатуу хөл хориондоо эргээд шилжиж байна. Арай гэж амь орж, хөдөлгөөнд орж эхэлж байсан ажил, үйлчилгээ эрхлэгчид дахиад л газар алгадаад уналаа. Буруутан нь хэн бэ?

Ямар ч байсан цар тахлын үед ажил үүрэг гүйцэтгэж буй эмч, эмнэлгийн ажилтнууд, онцгой, цагдаагийн байгууллагын алба хаагчдад буруу өгөх аргагүй. Харин Халдвар нэмэгдэх тоолонд бүх бурууг иргэд рүү бурууг чихдэг, амжилт гарах тоолонд “Бид л хийж байна, авран хамгаалж байна” гэж ярьдаг, ажлаа зохион байгуулахаас илүү хэвлэлийн бага хурал сайн зохион байгуулж, харагдах имиж, пиар дээрээ төвлөрч  ажилласан улстөрчдийн буруу. Өнгөрсөн найм, есөн сарын дотор /халдварын анхны тохиолдол үртгэгдсэнээс хойш/ Засгийн газраас хамгийн сайн хийсэн ажил нь өөрсдийгөө магтан дуулсан улс төрийн пиар, сурталчилгаа.

Ганцхан жишээ нь “Шахмал түлшний үнийг 75 хямдрууллаа” хэмээн зарласныхаа дөнгөж маргааш нь хошин урлагийнхныг оролцуулсан хэдэн 100 саяын сурталчилгааг бүх телевизүүдээр цацсан. Харин тэр түлшнээс нь болж хэдэн хүн хордож үхсэн тухай тоог нуун далдалсаар ирсэн. Мэдээллийн үнэн зөвийг зөвхөн Засгийн газрын эх сурвалжаар хэмжиж, иргэдийн дуу хоолой, итгэл үнэмшлийг хууль, шүүхээр хааж, боодог, дарамталдаг болсон. Үнэн үг хэлсэнд нь өсөрхөж, үлгэж үнссэнийг нь таалдаг тийм л тогтолцоо бий болсон.

Өнгөрсөн дөрөвдүгээр сард УИХ Ковидын тухай хуулийг баталж, Засгийн газарт төсвийн бүх эрх мэдлийг өгсөн ч хууль хэрэгжүүлэх, төсөв санхүүгээ хэмнэх, иргэд, ААН-үүдийг дэмжих, эдийн засгаа өөд татах талаар нэг ч ажил, алхам хийгээгүй. Одоо нөгөө хуулийнх нь хэрэгжилт дооохон хоногийн дараа дуусах гэж байхад хуулийн үйлчлэлийг сунгах, хэрэгжилтийг дүгнэх тал дээр нэг ч үг дуугарсангүй. Хууль баталсан УИХ нь ч шалгаж, шалгаасангүй. УИХ-ын гишүүд нь “Хүмүүнлэг боловсролын тухай хууль” ч гэх шиг элгийн элгийн төсөл бичээд, төсвөөс мөнгө саах тухай л бодож сууна. Мэргэжилтнүүдийн, профессионалиудын үгийг сонсдог нэг ч хүн алга.

Өнгөрсөн сард төсөв батлах үед эдийн засагчдын зүгээс “Эдийн засгаа хэт өөдрөгөөр хараад байна. Цар тахлын үед ийм их орлого, зарлага төлөвлөж болохгүй ээ” гэж хэлсээр, шүүмжилсээр байтал хоёр их наядыг алдагдал төлөвлөсөн. Хөл хорио тогтоогоод, аж ахуйн нэгж, бизнесүүд хаалгаа бариад, иргэд ажил, орлогогүй болоод эхлэхээр нөгөө алдагдалтай төсвөө удирдах, хэмнэлт хийхийн оронд татвар төлж байгаа нэг хоёрхон ААН дээрээ /Эрдэнэт үйлдвэр, Эрдэнэс Тавантолгой/ ачаа үүрүүлээд, эрчим хүчнийхээ салбарыг бүхэлд нь унагаах гээд явж байна.

Ийм байж Ерөнхий сайд, УИХ-ын гишүүд нь “Оны шилдэг”-т нэрээ дэвшүүлчихсэн иргэдээс санал асуугаад явж байх ч шиг. Яаж чадаж байна аа?

Б.СЭМҮҮН