Өнөөдөр Улаанбаатар-Замын-Үүд чиглэлд зорчиж байсан ачааны галт тэргэнд осол гарч, долоон чиргүүл замаас гарчээ.
Ослын талаар УБТЗ хамтарсан нийгэмлэгийн хэвлэлийн төлөөлөгч "Өнөөдөр Улаанбаатраас Замын-Үүд чиглэлд явж байсан ачааны вагоны долоон чиргүүл замаас гарсан осол гарсан. Энэ нь 08.30 цагийн үед "Багахангай" өртөөг өнгөрөөд "Мааньт" өртөө орчимд болсон.
Ослын улмаас хүн бэртэж гэмтээгүй, галт тэрэгний хөдөлгөөн саатаагүй хэвийн үргэлжилж байгаа. УБТЗ-ын сэргээн босгох ангийнхан 15:00 цагийн байдлаар дөрвөн чиргүүлийг зам дээр нь гаргасан. Үлдсэн гурван чиргүүлийг босгох ажил хийгдэж байна.
Ослын шалтгаан нөхцлийг тодруулахаар Зам, тээврийн хөгжлийн яамны улсын байцаагч, Тагнуулын болон цагдаагийн байгууллага, УБТЗ-ын тээврийн хянлтын алба, тээврийн прокурор тус тусын чиглэлээр газар дээр нь ажиллаж байна" гэсэн мэдээллийг өгчээ.
Эх сурвалж: TV5 телевиз