Өчигдөр өглөө Төв аймгийн Эрүүгийн хэргийн анхан шатны шүүхэд эхэлсэн ТЕГ-ын дарга асан Б.Хурц нарт холбогдох эрүүгийн хэргийн шүүх хурал өнөөдөр үргэлжилнэ. Өнгөрөгч оны арванхоёрдугаар сард эхэлсэн прокурорын мөрдөн шалгах ажиллагааны үр дүнд С.Зоригийн хэргийг шалгах явцдаа хуулийн байгууллагын ажилтнууд яллагдагч Б.Содномдаржаа, Т.Чимгээ нар дээр хууль бусаар эрүүдэн шүүх буюу хүний эрхийг ноцтой зөрчил гаргасан болохыг тогтоож, гүйцэтгэх ажиллагааны хууль тогтоомж зөрчсөн хэргээр эрүүгийн хэрэг хэрэг үүсгэн яллагдагчаар татсан билээ. Анх ТЕГ-ын хоёр, ШШГ байгууллагын нэг ажилтан дээр нээсэн эрүүгийн хэрэг одоо есөн холбогдогчтой болоод байгаа. Хэргийн мөрдөн шалгах ажиллагаанд оролцсон гүйцэтгэх ажилтнууд дээр уг хэрэгт хяналт тавьж ажилласан УЕП-ын орлогч асан Г.Эрдэнэбат, ТЕГ-ын дарга асан Б.Хурц нарт эрүүгийн хэрэг үүсгэн шалгаж яллагдагчаар татаад байгаа.

Өчигдөр эхэлсэн шүүх хурал хаалттай явагдсан бөгөөд энэ нь шүүхийн хүсэл зоригоос үл хамаарч байгаа гэдгийг яллагдагчдын өмгөөлөгчид хэлж байгаа. Учир нь хэлэлцэж буй асуудал нь өөрөө нууцын зэрэглэлтэй. Засгийн газрын 115 дугаар тогтоолоор эрүүдэн шүүсэн гэх бичлэгийн зөвхөн нэг хэсгийг тасдаж аваад олон нийтэд ил болгосон ч бусад 30 гаруй хавтаст хэрэг нууцын зэрэглэлтэй хэвээрээ байгаа. Хэргийг нууцын зэрэглэлээс гаргах асуудлыг ТЕГ-ын саналаар Засгийн газар шийдвэрлэх ёстой юм байна. Тиймээс шүүх энэ асуудлыг шийдэхгүй гэсэн үг.

Одоогийн байдлаар шүүх яллагдагчдын гэм бурууг тогтоох буюу гэм буруугийн асуудлыг хэлэлцэж байгаа. Хэрэв шүүх тэднийг "гэм буруутай" гэж үзвэл дараагийн шатны яллах ажиллагааг явуулах юм байна. Есөн холбогдогчтой, холбогдогч тус бүр өмгөөлөгч авсан учраас шүүх хурлын үйл ажиллагаа нэлээд суржрах бололтой. Шүүх хуралдаан өнөөдөр 09.00 цагаас дахин үргэлжилнэ.

Б.ЗАЯА