x

Б.Мэргэн: Шүүх хурлыг нээлттэй явуулах нь шүүхийн асуудал биш

Б.Хурц нарт холбогдох хэргийн шүүх хурал үргэлжилж байна. Шүүх хурлын завсарлагаар яллагдагчдын өмгөөлөгч Б.Мэргэн сэтгүүлчдэд товч мэдээлэл өглөө.

Тэр “Шүүх хуралдаан хэвийн үргэлжилж байна. Яг одоо шүүх хурлаар урьдчилсан хэлэлцүүлэг дээр өмгөөлөгчдийн өгсөн хүсэлтүүдийг хэлэлцэх гэж байна. Миний хувьд хүсэлт гаргаагүй, харин бусад өмгөөлөгч нар ямар хүсэлт гаргасан талаар би мэдээлэл өгөх боломжгүй байна. Шүүх хуралдааныг хаалттай, нээлттэй явуулах тал дээр нилээд маргаан үүсээд байх шиг байна. Хэлэлцэж буй асуудал нь нууцын зэрэглэлтэй хэрэг учраас үүнийг шүүх шийдэхгүй. Засгийн газрын 115 дугаар тогтоолоор хэргийн нэг хэсгийг л тасдаж аваад олон нийтэд ил болгосон. Бусад 30 гаруй хавтаст хэрэг нууц хэвээрээ байгаа. Энэ хэргийн нууцыг ил болгох асуудлыг Тагнуулын ерөнхий газрын саналаар Засгийн газар шийдвэрлэх ёстой. Тэрнээс биш шүүх шийдэхгүй” гэв.

Шүүх хуралдаанд С.Зоригийн хэргийг яллагдагч Б.Содномдаржаа оролцож, шүүхийн гадаа Б.Содномдаржаагийн ээж Л.Жавзмаа мөн ирсэн байна. Тэр “Энэ хэргийн талаар Монголын ард түмэн бүгд мэдэж байгаа. Гадаадын хүний эрхийн байгууллагууд ч гэсэн энэ хэргийн талаар мэддэг боллоо.  Жирийн иргэнийг 100 хувь хэлмэгдүүлж, өчнөөн зодуур, нүдүүрийн арга хэрэглэлээ. Т.Чимгээ, Б.Содномдаржаа хоёрыг түргэн суллахгүй бол одоо бие нь улам муудаж байна. Дөрвөн жил хоригдлоо шүү дээ. Би сард нэг удаа хүүтэйгээ уулздаг. Сүүлд 20-иод хоногийн өмнө хүүтэйгээ уулзсан. Саяхан эмнэлэгт хэвтүүлсэн учраас биеийн байдал гайгүй байна. Гэхдээ сэтгэл санааны асуудал маш хүнд байна. Өнөөдрийн шүүх хурлыг үнэн зөв шийдвэр гаргах байх гэж бодож байна” гэжээ.

АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

Top