Ирэх сарын 3-нд болох БНН-ын Онц их хуралтай холбогдуулж тус намын дарга Б.Жаргалсайхан сэтгүүлчдэд мэдээлэл хийлээ.
Б.Жаргалсайхан:
-Улс оронд юу болж байгааг та бүхэн өөрсдөө харж байгаа. Монгол Улсын нийт гадаад өр зээлийн хэмжээ 27 тэрбумд хүрсэн байна. Хэн, хэдэн сарын хэдэнд, яаж энэ мөнгийг авсан юм бэ. Үүнийг ил болгох ёстой. Нийгмийн олон салбарт хэр хэмжээнээс гажуудсан тогтолцоо үүслээ. Өнөөдөр Монгол Улсад 170 мянган оюутан их дээд сургуульд сурч байна. Нийгмийн баялаг хэн бүтээх вэ. Бүгдээрээ дарга болох уу? 180 мянган төрийн албан хаагчидтай. Манайх шиг гуравхан сая хүн амтай улсад ийм олон дарга ямар хэрэгтэй вэ?
Саяхан их сонирхолтой үйл явдал боллоо. Өмнөд, Хойд Солонгосын ерөнхийлөгч нар 11 жилийн дараа уулзлаа. Өмнөд Солонгосын эрчимтэй хөгжил, Хойд Солонгосын зохион байгуулалт энэ хоёр улсыг хүчирхэг болгосон. Үүнтэй адилаар бидний цөөхөн Монголчууд улс төр, нийгмийн амьдралдаа идэвхтэй оролцох ёстой. Иргэн бүр улс эх орон, хөгжлөө гэсэн сэтгэлтэй байж хөгжинө. Өнгөрсөн 27 жилийн нийгэм эдийн засгийн байдлаа бүгдээрээ нэг дүгнэж, цэгнэх цаг нь болсон. Муугаа ил гаргаж, хэрхэн сайжруулах талаар ярьж байж улс орон хөгждөг юм билээ.
Мөн бид гадаад, дотоодын санхүүгийн эх үүсвэрүүдээ маш хариуцлагагүй үрж байна. Миний мэдхийн 500 мянгаар орон сууц босч байгаа. Энэ орон сууцаа 2,5 саяар зарах гэж байна. Өөрөөр хэлбэл, 500 мянгаар орон сууц барьчихаад 8-10 дахин нэмж зарж байна. Энэ асуудлуудаа бид яаралтай шийдэх ёстой. Улаанбаатар хотод байгаа хэнд ч хэрэггүй диплом өгдөг их, дээд сургуулиудыг хаах хэрэгтэй. Манай залуучууд дор хаяж 2-3 мэргэжилтэй байх ёстой. Өнөөдөр олон залуус гадаад гарах хүсэлтэй байгаа боловч хэлгүй. Тиймээс 10 жилийн боловсролын тогтолцоонд англи хэлийг оруулах ёстой.
Бидний амьдралд дээр дооргүй хариуцлага, шударга ёс үгүйлэгдэж байна. Дарга нар хариуцлагагүй, шударга бус гэж их ярьж байна. Гэтэл иргэд бид өөрсдөө ямар байгаа билээ. Дээр дооргүй энэхүү шударга ёсны төлөө дүгнэж цэгнэж, ярих цаг нь болсон.
Өнөөдөр Монголд хэвлэлийн эрх чөлөө үгүйлэгдэж байна. Манай хэвлэлийнхнийг бүгдийг нь худалдаж авч байна. Энэ өчүүхэн биеэ бид одоо хэд дахин, хэдэн удаа худалдах вэ?
Иргэдийн нийгэм, иргэдийн улс төрийн идэвхийг нэмэгдүүлэх зорилготой. Улс төрийн намын хувьд, иргэний хувьд, намын даргын хувьд энэ асуудлуудыг бид одоо хэлэлцэж, ярилцах цаг нь болсон. Олон нийтийн хяналтын дор төр үйл ажиллагаагаа явуулах ёстой. Нийгэмд үгүйлэгдэж буй үнэн, худлын заагийг тогтоож, ярих болсон. Бидний зохион байгуулах гэж буй энэ ажилд та бүгдийг цаг заваа зориулан, идэвхтэй оролцохыг уриалж байна. Нэг хэсэг нь хагартлаа баяжаад, бусад нь ядуурдаг ийм тогтолцоог халах хэрэгтэй. Үүний төлөө Үндсэн хуулиа өөрчлөхгүй ээ. Бас дахиад баахан хоолны савнууд суучихаад биднийг баллана. Үүний оронд иргэддээ улс төрийн мэдлэг, боловсрол олгоё л доо. Сонгуулийн сурталчилгааг 14 хоног хоног биш 45 хоног болгож иргэн бүр сонгуулиа өгдөг болох ёстой. Дөрвөн жилд нэг удаа эрхээ хэрэгжүүлж чадахгүй бол тэр хүмүүст төрөөс үзүүлдэг үйлчилгээг хасах хэрэгтэй. Иргэн эрхээ эдлэхийн зэрэгцээ үүргэ биелүүлдэг байх ёстой гэв.
