Японы мэргэжлийн сумо бөхийн 69 дэх аварга М.Даваажаргал Монгол Улсын иргэншлээс татгалзах хүсэлтийг Монгол Улсын Ерөнхийлөгч Х.Баттулга хүлээн авч, зөвшөөрсөн байна.

Хакүхо М.Даваажаргал нь Японы эзэн хааны цомыг 42 удаа хүртэж, дээд зиндаанд 1000 гаруй, Их аварга буюу Ёкозүна цолтой 800 илүү давсан эвдэгпэхээргүй амжилтын эзэн болсон билээ.

Тэрбээр зодог тайлсаныхаа дараа өөрийн гэсэн дэвжээ байгуулахын тулд ийм шийдвэр гаргасан хэмэээн "Монгол тулгатны 100 эрхэм" нэвтрүүлэгт оролцож байхдаа Асашёорюү Д.Дагвадорж аваргатай ярилцаж үеэрээ хэлж байсан юм. Учир нь Сүмо бөхийн холбооны дүрмэнд зодог тайлаад ояката болж, дэвжээ нээх эрхийг зөвхөн Японы иргэнд л өгнө гэсэн заалттай байдаг байна.

Түүний иргэншлээ солих шийдвэрийнх нь талаар Кёкүшюзан Д.Батбаяр “Хакүхо М.Даваажаргал аварга Япон улсын иргэн болох хүсэлтээ албан ёсоор өгчээ. Хэдийгээр ийнхүү Япон улсын иргэн болж байгаа нь харамсалтай ч Японы мэргэжлийн сумо бөхийн холбооны хатуу дүрэм журмын дагуу тухайн улсын иргэншилтэй болох нь зайлшгүй юм. Сүмо бөхийн дэвжээний багш болсон манай Н.Цэвэгням, Б.Дашням болон Хавайн арлын бөхчүүд бүгд энэ замналаар явсан байдаг. Түүний энэ шийдвэр түр зуурынх бөгөөд төрсөн бие, төрөлх хэл, дотоод сэтгэл гурав нь Монголынх хэвээрээ үлдэж байгаа гэдгийг Монголын ард түмэн маань уужуу сэтгэл, холч ухаанаар хүндэтгэн аваарай” гэж өөрийн байр суурийг илэрхийлсэн байна.

Харин улстөрч Б.Жаргалсайхан "Миний хувьд их ухаантай аваргын хүү алсын харсан, улсаа бодсон шийдвэр гаргалаа гэж харлаа. Хувийн эрх ашгийн хувьд Япон улсын иргэн болсноор бизнес хийх, монголчууд яваад очих дэвжээ байгуулах (Хичнээн олон залуусын амьдрал сайжрах бол. Сумогоор шүргээд гарсан залуу ирээд л компани байгуулдаг юм даа), татвар шимтгэлээ бага төлөх бололцоо бүрдэнэ. Хоёрдугаарт Монгол Улсын нэр хүндийг 2020 оны олимпод ихэд өргөж Япон-Монголын харилцаанд үнэтэй хувь нэмэр оруулна. (Монгол Улсад хамгийн их зээл тусламж, хандив Япончууд л өгдөг) М.Даваажаргал сэтгэл буруу байсан бол эртнээсээ Монгол Улсад бизнес хийхгүй байсан. Түүний барилга байгууламж, дэлгүүр, рестрон, цагаан будааны талбай, мал аж ахуй нь хүртэл байна. Дахиад бүр банк санхүүгийн байгууллагад хүч үзэхээр явж байгаа юм билээ. Чингис хаан "Сэтгэлийг нь хураасан байхад бие нь хаа холдох вэ" гэдэг шиг М.Даваажаргал нас явах цагтаа эх орон руугаа гүйнэ. Аавынхаа нутагт хөшөө дурсгал, хөрөнгө оруулалт хийх юм билээ. Энэ залууд Монте Кристо гүн шиг баян болох эх орноо хөгжүүлэх мөрөөдөл бий. Тийм зүйл ярьдаг их аваргын алсын хараатай хүүг бүү муул. Цаадах бодол, мөрөөдлийг хар, Том зорилготой, том сэтгэдэг аавын хөвгүүд өчүүхэн хэрүүл, доромжлолоос айдаггүй юм. Монголын харьяатаас гарах гэж эх орондоо багтаж шингэхээ байлаа, хавчаад байна, би тэмцэгч, эх оронч гэсэн худлаа өргөдөл барьсан залуус Элчин сайдын яамны үүдээр зөндөө байгаа. Тэд нараас тэс өөр байгуулсан гавьяатай М.Даваажаргал улам урагшаа зүтгэж байгааг анзаарах ухаан алга уу та нарт.. Эргээд ирэх сэтгэлийг нь бүү бууруул. Эрдэнэсантын хүүхдүүд цаанаа шөрмөстэй дамшигнууд шүү гэж Итгэлт гуай нь хэлсэн билээ" гэсэн юм.

Магадгүй Их аварга маань Японы иргэн болсноор өөрийн нэрээр дэвжээ байгуулж, монголын хувьд анхны их аваргын дэвжээтэй болж олон олон Монгол бөхчүүд барилдах боломж бий болох ч юм билүү. Цаашлаад монгол залуу Японы сүмо бөхийн холбооны тэргүүн болохыг хэн ч үгүйсгэхгүй. Энэ бүхэн түүний чин хүсэл ч байж болох юм.