НҮБ-ын Ерөнхий ассамблей 1967 онд анх энэ өдрийг мансууруулах бодис хэрэглэх болон түүний хууль бус эргэлттэй тэмцэх (International Day against Drug Abuse and Illicit Trafficking) олон улсын өдөр болгон зарласан юм.

Энэ өдөрт зориулан манай улсад өнөөдөр ЦЕГ-аас Буянт-Ухаа, Сэлэнгэ аймгийн Алтанбулаг, Өмнөговь аймгийн Гашуунсухайт, Дорноговь аймгийн Замын-Үүд боомт болон Орхон аймгийн Баян-Өндөр суманд энэ төрлийн гэмт хэрэг, зөрчлөөс урьдчилан сэргийлэх ухуулах нөлөөллийн үйл ажиллагаа явуулахаар төлөвлөжээ.

Түүнчлэн Монгол Улсын иргэдийг гадны улс оронд зорчихдоо энэ төрлийн гэмт хэрэгт холбогдох болон хүний гуйвар, мөнгө амласан ачаа тээшийг авахгүй байх, авсан тохиолдод сайтар шалгаж мэдээлэх талаар сэрэмжлүүлэх мэдээллийг хүргэх юм.

Мөн Сэтгэцийн эрүүл мэндийн үндэсний төвөөс мэргэжилтнүүдэд зориулан хар тамхи, мансуурах гэмт хэрэгтэй тэмцэх, илрүүлэхэд анхаарах талаар мэргэшүүлэх сургалтыг зохион байгуулна. Энэ өдөрт зориулан Нийслэлийн Эрүүл мэндийн газрын харьяа Наркологийн төвөөс нээлттэй хаалганы өдрийг худалдааны “Энхжин” төвд зохион байгуулах аж.

Баримтууд:

-Героиныг ханиалгахын эсрэг эм гэж анх бүтээсэн ба 1971 он хүртэл немецийн эмийн сангуудад чөлөөтэй худалдаж байжээ.

-Кокаин нь зүрхний цахилгаан идэвхижилд нөлөөлдөг ба тэр нь эрүүл хүнийг ч зүрхний шигдээс болгож магадгүй.

-Нидерланд улс одоо марихуаны хэрэглээгээр хамгийн бага төвшинтэй, мансууруулах бодисны улмаас үүдэлтэй үхлээр хамгийн доогуур үзүүлэлтэй орон болжээ.

-ЛСД анх 1938 онд гарч ирсэн ч түүний мансууруулах шинж чанарыг 1943 онд тогтоожээ.

-Нэг тонн кок модны навч цуглуулж байж нэг кг кокаин гарган авдаг. Навчийг хүхрийн хүчил, ацетон, бензин, аммиак, давсны хүчил, эфирээр боловсруулдаг ажээ.

-Нэг грамм кокаины өөрийн өртөг нь хэдхэн цент боловч түүнийг 100 доллараар худалддаг байна.

-Каннабис (олс өвс) өнөөдөр нэхмэлийн үйлдвэрт дээр үеийнх шигээ хэрэглэгддэггүй. Тэр нь анх хөвөнг орлож байжээ.

-Роберт Луис Стивенсон "Доктор Жекилл, мистер Хайд" романыг зургаан өдөр, зургаан шөнийн дотор бичихдээ кокаины мансууралд байв. Стивенсоны эхнэр нь кокаины согтууралд тийм их текст бичсэнд гайхаж байлаа. 60 мянган үг бичсэн байж. Тэр өмнө нь сайндаа л өдөрт 1000 үгтэй байдаг байжээ.

-Экстезийг анх сүлжээний маркетингаар тараасан юм. Энэ пирамидыг үүсгэгч Майкл Клегг хэдхэн жилийн дотор экстазийг маш хүртээмжтэй болгож өгсөн байв. Түүнийг бар, клубуудад дэлгүүрийн ердийн бараа шиг картаар төлөн авч болох байв.

-Зигмунд Фройд кокаиныг эхлээд эмнэлэг талаас нь судлаад тэр түүнийг анх 1884 онд хэрэглэж үзээд үйлчилгээнд нь гайхсан байв. Энэ бодис түүнийг сэтгэл санааны дарамтаас салгаж, өөрт нь итгэл өгчээ. Тэр ид шидэд нь итгэсэн бөгөөд дараа нь түүний хамаарлаас гарахын тулд их цаг зарцуулжээ.

Өнөөдөр мөн дэлхийн Тамлан байцаалтын хохирогчдыг дэмжих олон улсын өдөр тохиож байна.

НҮБ-ын Эдийн засаг ба нийгмийн зөвлөлийн зөвлөсний дагуу зургадугаар сарын 26-ныг Тамлан байцаалтын хохирогчдыг дэмжих өдөр (International Day in Support of Victims of Torture) болгох шийдвэрийг 1997 онд гаргажээ.