Долоон настай охиныг нагац ах нь зодож, улмаар гарынх нь хуруунуудыг цавчин халуун усаар түлж тамласан Сүхбаатар дүүргийн 17 дугаар хороо, Дамбадаржаад гарсан тухай бид өмнө мэдээлсэн. Охины хөл түлэгдсэн, мөн толгойн хэсэгт иртэй зүйлээр зүссэн байснаас гадна зүүн гарын дунд, долоовор хуруу, баруун гарын эрхий хурууг нь тасалж яргалжээ.

Хэрэг гарсан орой буюу энэ сарын 14-нөөс 15-нд шилжих шөнө охиныг Гэмтэл согог судлалын үндэсний төвд хүргэж, 02.00 цагийн орчимд яаралтай хагалгаанд оруулсан байна. Хагалгаа 13 цагийн турш үргэлжилж, гарын гурван хурууны шөрмөсийг залгасан ч нэг хурууг залгах боломжгүй болсон учир тайрчээ. Охины гэр бүлийнхэн болсон явдалд ихээхэн цочирдсон, хүүхдийн биеийн байдалд маш их санаа зовж байгаа ч болсон явдлын талаар тайлбар хийхээс татгалзаж, хуулийн байгууллагын шийдвэрийг хүлээж байна.

Хохирогч охин эхээс гурвуулаа. Бага дүү нь эмнэлэгт хэвтсэн тул ээж нь сахих шаардлагатай байжээ. Тиймээс охиныг сургуулиас нь авч өгөхийг нагац ах “Ш”-ээс гуйсан гэнэ. Нагац ахын гэр нь охины сургуультай ойрхон болохоор заримдаа хичээлээс нь авдаг байж. Хэрэг гарсны дараа охин нагац ахаасаа зугтаж, гудамжинд уйлаад явж байхад нь иргэдийн дуудлагаар цагдаагийн алба хаагчид очсон байна. Цагдаа, түргэн тусламж зэрэг шахуу ирж хоёр тийш нь авч явсан тул “Ш”-тэй уулзаж амжаагүй талаар гэр бүлийнхэн нь ярьсан байна. 

“Ш” нь архи хэтрүүлэн хэрэглэх зуршилтай. Гэмт хэрэг үйлдэгдсэн өдөр ч согтуу байсан аж. Өнөөдрийн сонинд мэдээлснээр охин маш их цочирдсон, сэтгэл зүйн байдал хэцүү, унтаж чадахгүй байгаа гэнэ. “Ш” нь нүдний шил зүүдэг тул охин нүдний шилтэй эмч орж ирэхээр айн цочиж "ээж, аавыг" дууд хэмээн айн чичирч байгаа гэнэ. Хохирогчийн хэлснээр нагац ах нь хүчирхийлэх ямар нэг үйлдэл гаргаагүй бололтой. Харин англиар янз бүрийн зүйл асууж мэдэхгүй гэх тоолонд зодсон гэнэ.

Охины гэр бүлийнхэн итгэж найддаг, ойр дотны хүн ийм балмад үйлдэл гаргасанд итгэж чадахгүй байна гэжээ.