Эрүүл мэндийн сайд Д.Сарангэрэл өнөөдрийн чуулганы хуралдаан дээр сүрьеэ өвчний асуудлаар мэдээлэл хийлээ.
Тэрээр, Хан-Уул дүүргийн 15 дугаар сургуульд сүрьеэ өвчний 38 өвчний тохиолдол, 200 гаруй халдвар бүртгэгдлээ. Урьдчилан сэргийлэх үзлэгийг орон даяар хийх шаардлагатай байгаа. Өнөө өглөө дахиад Төв аймгийн диспансераас Төв аймгийн Сүмбэр сумын сургуульд мөн сүрьеэ өвчний зургаан тохиолдол, халдвар авсан 200 тохиолдол тогтоогдлоо гэсэн мэдээлэл ирүүллээ. Бид бол үнэнтэй нүүр тулах ёстой. Яах вэ, намайг шүүмжилнэ л биз. Миний асуудал гол биш. Үүнийг нуух юм уу юм бол хүндэрнэ. Багш, сурагчдын амь нас, эрүүл мэндэд хүндрэл учирна. 2020 оны үндсэн чиглэлд урьдчилан сэргийлэх үзлэгт чиглэж байгаа" гэлээ.
Төв аймгийн Сүмбэр сум нь Жавхлант, Сүмбэр хэмээх хоёр багтай, 2011 оны тооллогоор 1740 иргэнтэй сум юм. Сэлэнгэ аймгийн Баянгол, Орхон, Төв аймгийн Жаргалант сумтай хиллэдэг.
Мэдээллийн livetv.mn сайт тус сумын ИТХ-ын дарга Г.Амарбаясгалантай холбогдож тодруулахад “Манай сумын сургуульд 300 гаруй хүүхэд л суралцдаг. Өчигдөр аймгаас хүмүүс ирж ажиллаж байгаа гэж байсан. Харин 200 хүүхдээс сүрьеэгийн халвар илэрсэн гэх мэдээлэл худлаа. Хэрвээ үнэн байсан бол надад мэдээлэл ирэх ёстой байсан” гэж хэлсэн байна. Хотод байгаа Эрүүл мэндийн сайд чуулганы хуралдаан дээр сүрьеэ өвчний мэдээлэл хэлж байхад сумын ИТХ-ын дарга нь мэдээгүй л байна. Энэ бол тухайн албан тушаалтны хариуцлага ямар байгааг илтгэж байгаа асуудал юм.
