Ерөнхийлөгч Х.Баттулга, Ерөнхий сайд У.Хүрэлсүх нарын авилгатай хийх тэмцэл замаасаа хазайж АН-ын лидерүүдийг намнах замдаа оров. АН-ын эрх барьж, барилцаж байх хугацаанд хийсэн шийдвэртэй алхам бүр үүний золиос болж байна. Хамгийн түрүүнд Оюутолгойн хөрөнгө оруулалтын гэрээнээс эхэллээ.

Эхлээд Оюутолгойн хөрөнгө оруулалтын гэрээг байгуулсан Сангийн сайд асан С.Баярцогтыг барьж хорив. Араас нь Дубайн гэрээг хийсэн Ерөнхий сайд асан Ч.Сайханбилэг ачигдаж байна.

Алдаа, оноотой ч бай энэ хоёр гэрээ, Оюутолгой төсөл ганхаж байсан Монголын эдийн засгийг тогтоон барьж байгаа нь үнэн. Ардчилал, зах зээлд хөл тавьснаас хойш монголчуудыг гуравдагч зах зээлтэй холбосон хамгийн том төсөл, хамгийн том гэрээ хэлцэл гэдэг нь ч үнэн.

Гэтэл МАН эрх бариад энэ гэрээ хэлцлүүдийн улам сайжруулах, дараачийн том төслүүдээ урагш хөдөлгөхийн оронд аль болж бүтэж байгаагаа барьж иддэг хуучин зуршлаараа ажиллаж байна. Гэхдээ МАН ингэж байгаа нь хачин биш, МАН-ын хийж байгаа бүхнийг дуугүй харж, дотогшоо дэмжиж байгаа АН илүү эмгэнэлтэй харагдаж байна.        

Хэрвээ АН эрх барьж байхдаа МАН-ын экс сайд нарыг ар араас нь барьж хорьсон бол тэд ингэж яавч “бөгсөө хавчаад” суухгүй. Намынхаа бүх гишүүдийг цуглуулаад, дан, давхар дээлээ нөмрөөд талбай дээр гарчихсан цагаан хоолойгоор хашгичиж байгаа. Улс төрийн сөрөг хүчин гэдэг тийм л байдаг.

Харин АН-ын дарга С.Эрдэнэ С.Баярцогтыг сэжигтнээр татсанаа АТГ албан ёсоор зарлаж ч амжаагүй байхад “АН-аас хасав” хэмээн зарласан билээ. “Гэмт хэрэг үйлдсэн эсэхийг зөвхөн шүүх эцэслэн шийднэ, шүүхийн хүчин төгөлдөр тогтоол гараагүй байхад хэнийг ч гэмт буруутайд тооцож болохгүй” гэсэн Үндсэн хуулийн зарчмаа ч умартсан. Одоо Ч.Сайханбилэгийг ээлж ирж байх шиг.

Болж буй үйл явдалд АН-ыг буруутгах шалтгаан нь хуулийн байгууллагын хийж буй ажлыг эсэргүүцэхэд биш, харин учирч болзошгүй эрсдлээс урьдчилан сэргийлэхэд юм. АН ямар ч тохиолдолд “ардчилсан” гэдэг нэрээ авч үлдэхийн тулд улс төрийн болоод хуулийн аргаар хүн хэлмэгдүүлэх, хилсээр гүтгэгдэж, нэр төр нь хохирохоос намынхаа гишүүдийг, нийт иргэдээ хамгаалах, хаацайлан зогсох үүрэгтэй. Ядаж л “Гэмт хэрэг үйлдсэн гэж сэжиглэх, цагдан хориход хүргэсэн хангалттай үндэслэл, нотлох баримт байна уу?" гэж асуух, "Гэм бурууг нь шүүх эцэслэн тогтоохоос нааш гэмт хэрэгтэнд тооцож, нийгмээрээ яллаж болохгүй” гэж хэлэх эр зориг энэ намын удирдлагад байх ёстой.

Б.ЗАЯА