Ерөнхийлөгч Х.Баттулга дахин нэг зарлиг гаргав. Тэр 2018-2019 оныг “Авлигаас татгалзах, илчлэх, авлигын гэрч, мэдээлэгчийг хамгаалах жил” болгон зарлав. Энэ ажлын хүрээнд авлигын эсрэг хуулийн хэрэгжилт, үр нөлөөг судлан сайжруулах, авлигыг илрүүлж илчилсэн иргэнийг урамшуулах, хамгаалах, авлига, албан тушаалын  гэмт  хэргийг   хянан   шийдвэрлэх ажиллагаанд  оролцож   байгаа гэрчийг хамгаалах, эрх зүйн орчинг боловсронгуй болгох арга хэмжээг цаг алдалгүй авахыг Засгийн газарт зөвлөсөн байна.

Эрх зүйн орчинг боловсронгуй болгох хүрээнд авлига, албан тушаалын гэмт хэргийн гэрч, мэдээлэгчийг аюулгүй байдлын болон амьдрах нөхцөл, эдийн засгийн баталгааг хангах, шүүх ажиллагааны аюулгүй байдлыг хангах, гэрч, хохирогчийг хамгаалах хүрээнд төрийн байгууллагуудын чиг үүрэг, тогтолцоог боловсронгуй болгохыг зөвлөжээ.

Мөн авлигаас татгалзах, авлигыг үл зөвшөөрөх үзлийг үйл ажиллагаандаа баримталж, түгээн дэлгэрүүлэхыг төрийн болон төрийн бус байгууллага, компани, аж ахуйн нэгжүүдэд уриалж, гэм буруутай этгээдэд хуулийн хариуцлага хүлээлгэхийн төлөө нягт хамтарч, дэмжин ажиллахыг ард иргэдэд хандан уриалсан байна. Зөв!!!

Гэвч авилгатай тэмцэхэд хамгийн их саад болж буй зүйл нь Авлигын эсрэг хууль өөрөө. Хуульд авлига авсан, өгсөн этгээдийг хоёуланг нь шийтгэхээр заасан нь хэргийг илрүүлэхэд хамгийн их саад учруулж байгаа. Авлигын гэмт хэрэг бусад гэмт хэрэгтэй адил ил үйлдэгддэг, гэрч, мэдээлэгч үлдээдэг хэрэг биш. Авилга авсан, өгсөн этгээдээс өөр гэрч үлддэггүй, авлига өгсөн, авсан этгээдийн аль нэг нь гэрчлэхгүйгээр энэ хэрэг илэрдэггүй.

Тиймээс бусад улс оронд авилга авсан, өгсөн этгээдийн аль нэгэнд хуулийн хариуцлага оногдуулдаг, авилга авсан болон өгсөн этгээд аль нэгд нь хариуцлага хүлээлгэдэг, авлига авсан, өгсөн этгээд сайн дураараа мэдүүлэг өгсөн тохиолдолд хариуцлагаас чөлөөлдөг хуультай. Харин манайд авсан, өгсөн хоёуланд нь хариуцлага тооцох хуультай учраас энэ хэргийн талаар мэдээлэл ирдэггүй, мэдээлэл ирсэн ч хэргээ хүлээн зөвшөөрдөггүй.

Тиймээс Ерөнхийлөгчийн хэлсэнчлэн “гэмт хэргийн гэрчийг хамгаалах” гэж байгаа бол хамгийн түрүүнд хуульдаа өөрчлөлт оруулж, авлига өгснийг биш, авсныг нь шийтгэдэг болох хэрэгтэй. Өөрөөр авлигын гэмт хэргийн гэрчийг хамгаалах боломжгүй юм.

Б.Цэцэн