Төв Америкийн Никарагуа улсын 80 настай Ерөнхийлөгч Даниэль Ортега сөрөг хүчнийг засгийн эрхэнд гаргахгүй байх үүднээс тус улсад цаашид сонгууль явуулахгүй гэж мэдэгджээ. 2007 оноос хойш төрийн тэргүүний албан тушаалыг хашиж байгаа Д.Ортега мэдэгдэхдээ, сөрөг хүчний эсрэг "хана босгох" шинэ хуулиудыг батлуулахын тулд өөрийн хяналтад байдаг Конгресстой хамтран ажиллана гэсэн байна.
"Сөрөг хүчний намууд засгийн эрхийг булаан авахыг оролдох боломж олгохгүйн тулд дахин ямар ч сонгууль явуулахгүй" хэмээн тэрбээр Сандинистын хувьсгалын 47 жилийн ойн баярын үеэр хэлжээ.
Никарагуад хамгийн сүүлд 2021 онд ерөнхийлөгчийн сонгууль болсон бөгөөд дараагийн сонгуулийг 2027 онд явуулах ёстой. Гэвч Д.Ортега сонгуулийг бүрмөсөн цуцлах эсэх, эсвэл сөрөг хүчнийг сонгуульд оролцохыг хориглох эсэхийг тодорхой дурдаагүй байна. 2021 оны сонгуулийн кампанит ажлын үеэр тус улсад улс төрийн хэд хэдэн намыг хориглож, сөрөг хүчнээс нэр дэвшсэн хүмүүсийг шоронд хорьж байжээ.
Ташрамд дурдахад, Никарагуагийн эрх баригчид НҮБ-ын Хүнс, хөдөө аж ахуйн байгууллагын (FAO) тайлангийн дүгнэлттэй санал нийлэхгүй байгаагаа илэрхийлэн тус байгууллагаас гарахаа мэдэгдсэн байна.
