Сонгуулийн сурталчилгааны үеэр нийгмийн сүлжээ ашиглах журмыг чангаруулсан хуулийг Японы парламент баталжээ. Уг баримт бичигт нэр дэвшигчдийн талаар худал мэдээлэл түгээхийг хориглосноос гадна, хиймэл оюун ашиглан бүтээсэн контентуудыг нийтлэхэд мөрдөх шинэ шаардлагыг тусгасан байна.
Энэхүү хууль нь сонгуулийн ил тод байдлыг дээшлүүлэх, үг хэлэх эрх чөлөөг хамгаалах, мөн иргэдийг нэр дэвшигчдийн талаарх бодит мэдээллээр хангахад чиглэжээ. Мөн нийгмийн сүлжээний платформуудын операторуудад сонгуулийн үеэр худал мэдээлэл түгээхийг хязгаарлах арга хэмжээ авахыг үүрэг болгосон байна.
Эдгээр шаардлагыг хэрэгжүүлэх зөвлөмжийг Японы Дотоод хэрэг, харилцаа холбооны яам боловсруулж, хэрэгжилтийн талаарх тайланг жил бүр нийтлэх ажээ. Гэхдээ шинэ журмыг мөрдөөгүй платформуудад хариуцлага тооцох заалт хуульд тусгагдаагүй тул шинжээчид үр дүнтэй хэрэгжинэ гэдэгт эргэлзэж байна.
Мөн хиймэл оюун ухаан хэрэглэхтэй холбоотой шинэ зохицуулалтыг уг хуульд тусгажээ. Тодруулбал, нийгмийн сүлжээний платформууд сонгуультай холбоотой хиймэл оюунаар бүтээсэн эсвэл засварласан зураг, дүрс бичлэгийг нийтлэхдээ тухайн контентыг хиймэл оюун ашиглан бүтээсэн, эсвэл өөрчилсөн болохыг заавал тэмдэглэх ёстой.
Дагалдах журамд платформуудад худал мэдээлэлтэй тэмцэх нэмэлт арга хэмжээ авахыг зөвлөсөн байна. Тухайлбал, эргэлзээтэй контентоос орлого олох боломжийг түр зогсоох, албан ёсны эх сурвалжийн мэдээллийн харагдацыг нэмэгдүүлэх, хэрэглэгчдэд зориулсан анхааруулга байршуулах зэрэг арга хэмжээ авахыг зөвлөжээ.
Шинэ журам Японы орон нутгийн ээлжит нэгдсэн сонгуулиас өмнө буюу 2027 оны гуравдугаар сарын 1-ний өдрөөс хэрэгжиж эхэлнэ.
