Японы Ерөнхий сайд агсан Абэ Шинзо сонгуулийн сурталчилгааны үеэр үг хэлж байхдаа буудуулан амиа алдсанаас хойш дөрвөн жил өнгөрч буйтай холбогдуулан лхагва гаригт олон хүн тус улсын баруун нутгийн Нара хотод түүний дурсгалыг хүндэтгэн цэцэг өргөлөө. Абэ Шинзо 2022 оны долоодугаар сарын 8-ны өдөр Нара хотын "Ямато-Сайдайжи" өртөөний ойролцоо сонгуулийн сурталчилгааны үг хэлж байхдаа буудуулан амиа алдсан юм.

Абэ агсанд хүндэтгэл илэрхийлэхийр Киото хотоос ирсэн 60 гаруй насны нэгэн эрэгтэй түүнийг Японы сайн удирдагч байсан хэмээн дурсаад, талийгаач Ерөнхий сайдаас улс орноо үргэлж ивээн хамгаалж байхыг хүсэн залбирсан гэжээ. Мөн Киото хотоос ирсэн 20 гаруй настай нэгэн залуу дурсахдаа, дөрвөн жил харвасан сум шиг л өнгөрчээ, хүчирхийллийн хэргийн улмаас удирдагчаа алдсан гэдгийг залуу үеийнхэн мэдээсэй гэж хүсэж байгаагаа дурдсан байна. 

Ерөнхий сайд асныг буудан хөнөөсөн 45 настай Ямагами Тецүяад Нара хотын дүүргийн шүүхээс энэ оны нэгдүгээр сард бүх насаар нь хорих ял оноосон бөгөөд түүний өмгөөлөгчид уг шийдвэрийг давж заалджээ. Анхан шатны шүүх хурлын үеэр Ямагамид оноох ялын хүнд хөнгөн байдал, түүний өссөн орчныг хэрхэн харгалзан үзэх вэ гэдэг асуудал гол маргааны сэдэв байв.

Шүүгдэгчийн ээж “Эв нэгдлийн сүм” нэрээр үйл ажиллагаа явуулж байсан шашны байгууллагад их хэмжээний хандив өгсний улмаас түүний гэр бүл санхүүгийн бэрхшээлтэй тулгарсан байжээ. Энэ асуудал ч бас давж заалдах шатны шүүх хурлын гол асуудал байх төлөвтэй байна.

Yonhap