Дэлхийн батлан​​​​ хамгаалахын шинэ банк байгуулахыг дэмжинэ гэдгээ есөн улс амласан нь холбоотон орнуудыг дахин зэвсэглэх олон талт хамтын ажиллагаанд чухал алхам боллоо гэж Канадын Ерөнхий сайд Марк Карни мягмар гаригт мэдэгджээ. Туркийн нийслэл Анкара хотод болж буй НАТО-гийн дээд хэмжээний уулзалтын үеэр мэдэгдэхдээ, Албани, Бельги, Грек, Латви, Люксембург, Румын, Турк, Украин улсууд Батлан хамгаалах, аюулгүй байдал, тэсвэрлэх чадавхын банк (DSRB) байгуулах санаачилгыг дэмжихээ илэрхийлсэн бөгөөд тус банк Канадад төвтэй ажиллана гэсэн байна. 

Одоогоор гишүүн орнуудын жагсаалтад "Долоогийн бүлэг"-ийн (G7) орнуудаас Канадаас өөр улс багтаагүй байгаа нь банкны санхүүгийн чадамжийг хязгаарлаж магадгүй байна. Гэсэн хэдий ч Канадын Гадаад хэргийн сайд Анита Ананд тус банк шинэ гишүүдэд нээлттэй байх болно гэж мэдэгджээ. Банкийг 100 тэрбум хүртэлх фунт стерлингийн (134 тэрбум ам.доллар) хөнгөлөлттэй нөхцөлтэй санхүүжилт босгох замаар ижил байр суурь баримталдаг холбоотон орнуудын батлан хамгаалах чадавхыг бэхжүүлэх зорилгоор байгуулж байгаа аж. 

Канадын тал түнш орнууддаа уг санаачилгыг соёрхон батлахыг санал болгож, DSRB-ны үйл ажиллагааг 2027 онд эхлүүлэхээр төлөвлөж буйг М.Карни мөн мэдэгдсэн байна. Түүнчлэн Оросын цэргүүд Украин руу халдан довтолсон нь холбоотон орнууд батлан хамгаалах үйлдвэрлэлийн хүчин чадлаа хурдацтай, далайцтай өргөжүүлэх шаардлагатай гэдгийг тод харуулсан гэж онцолжээ.  Люксембургийн эрх баригчид уг санаачилгыг дэмжинэ гэдгээ өмнө нь албан ёсоор мэдэгдсэн байна. 

Reuters