В12 аминдэмд суурилсан нэгдэл нь глиобластома гэдэг тархины хавдрын хамгийн аюултай хэлбэрийг эмчлэхэд үр дүнтэй гэдгийг эрдэмтэд тогтоосон байна. Энэхүү клиникийн өмнөх судалгааны дүнг Oncoscience сэтгүүлд нийтэлжээ.

Уг судалгааг Nitric Oxide Services компанийн судлаач Жозеф А.Бауэрын удирдсан эрдэмтэд Кливлендийн эмнэлгийн Хавдар судлалын төвийн мэргэжилтнүүдтэй хамтран хийсэн байна. Тэд хавдрын эсүүдэд азотын ислийг шууд хүргэдэг нитрозилкобаламин (NO-Cbl) хэмээх В12 аминдэмийн шинэ хэлбэрийг судалжээ.

Глиобластома бол тархины хамгийн аюултай хавдруудын нэг бөгөөд мэс засал, туяаны эмчилгээ, химийн эмчилгээ хийсэн ч гэсэн онош тогтоосны дараа өвчтөний амьд явах хугацаа 15 сараас хэтэрдэггүй байна.

Амьтад дээр хийсэн туршилтын явцад NO-Cbl нь хамгаалалтын гематоэнцефалик саадыг давж, хавдрын эсүүдэд хуримтлагдаж буйг тогтоожээ. Ингэхдээ уг нэгдэл нь хавдрын эсүүдэд 24 цагаас доошгүй хугацаанд идэвхтэй байж, азотын ислийн үйлчлэлийг удаан хугацаанд хангасан байна.  

Мөн NO-Cbl-ийг химийн эмчилгээний темозоломид гэдэг эм болон TRAIL туршилтын эмчилгээтэй хослуулснаар хавдрын өсөлтийг мэдэгдэхүйц үр дүнтэйгээр дарангуйлж байгааг /тус тусад нь хэрэглэснээс илүүтэйгээр/ лабораторийн судалгаагаар тогтоожээ. Энэхүү шинэ нэгдэл нь хавдрын эсүүдийн эмчилгээнд тэсвэртэй байдлыг бууруулж, улмаар тэдгээрийг үхүүлснээр одоо хийж буй эмчилгээний үр дүнг сайжруулна гэж судлаачид найдаж байна.

Гэхдээ дээрх судалгааны дүн нь клиникийн өмнөх шатных тул NO-Cbl-ийг эмчилгээнд хэрэглэхийн өмнө оновчтой тун ба үйлчлэх механизмыг яг таг тодорхойлохын тулд нэмэлт судалгаа явуулах шаардлагатай ажээ. 

Kazinform