Украины тал Оросын газрын тосны байгууламжууд руу тасралтгүй довтолж байгаатай холбоотойгоор ОХУ-ын газрын тос боловсруулах томоохон үйлдвэрүүдийн хүчин чадлыг дээд цэгт нь хүртэл ашиглаж байгаа тухай тус улсын Ерөнхийлөгч Владимир Путин ням гаригт дотоодын зах зээлийг түлшээр хангах асуудлаарх зөвлөгөөний үеэр мэдэгджээ.

Оросын эрчим хүчний гол компаниудын удирдлагууд оролцсон уг уулзалтын үеэр В.Путин хэлэхдээ, долоодугаар сард гол нэр төрлийн түлшний үйлдвэрлэл зургаадугаар сарын үзүүлэлтээс давах болно гэлээ. "Бид нөөцөө ашиглаж эхэлсэн хэдий ч одоогийн байдлаар бензиний нөөц өмнөх оны мөн үеийн түвшинтэй бараг ижил байна" хэмээн тэрбээр нэмж дурджээ. 

Түүний хэлснээр, бензиний нөөц 1.7 сая тонн байгаа нь өмнөх оны мөн үеийнхээс 4 хувиар бага үзүүлэлт юм. В.Путин мөн тус улсад түлшний хомсдол үүсээд байгааг хүлээн зөвшөөрчээ. "Автомашин сонирхогчид болон бизнес эрхлэгчдэд тулгарч буй асуудлууд хэвээр байна. Харамсалтай нь, шатахуун түгээх станцууд дээр дараалал үүссэн хэвээр байгаа бөгөөд шаардлагатай маркийн бензинийг тэр бүр олох боломжгүй байна" гэж тэрбээр хэлсэн байна. 

ОХУ-ын 50 гаруй бүс нутагт түлшний асуудал үүсээд байна

"Reuters" агентлагийн мэдээлснээр, Оросын бензиний үйлдвэрлэл одоогоор дотоодын хэрэглээний дөнгөж 80 орчим хувийг хангаж байна. "Оросын эрчим хүчний салбарт явуулж буй Украины довтолгооны улмаас их хэмжээний хохирол учирч, тус улс түүхэн дэх хамгийн хүнд түлшний хямрал руу ойртож байна" гэж "Energy Intelligence" компанийн шинжээчид тус агентлагт ярьжээ.

"The Bell" хэвлэлийн тооцооллоор, зургаадугаар сарын дунд үеийн байдлаар Оросын ихэнх бүс нутагт түлшний хангамжид асуудал үүсжээ. ОХУ-ын 50 гаруй бүс нутаг, түүнчлэн Оросын тал өөртөө нэгтгэсэн Украины газар нутгуудад хувийн автомашинуудад түлш олгохыг түр хугацаагаар хязгаарласан байна.

Украины тал Оросын газрын тос боловсруулах үйлдвэрүүд, газрын тосны баазууд руу дроноор довтлох ажиллагаагаа эрчимжүүлсний дараа буюу тавдугаар сард ОХУ-ын газрын тосны олборлолт сүүлийн нэг жилийн хамгийн доод цэгтээ хүрч буурсан байна. "Reuters" агентлагийн мэдээлснээр, тавдугаар сарын сүүлчээр өгсөн цохилтуудын улмаас тус улсын төв хэсэгт байрлах газрын тосны салбарын бараг бүх томоохон байгууламжууд үйл ажиллагаагаа хумих эсвэл бүрмөсөн зогсоожээ.