БНСУ-д гадаадын иргэд залилах гэмт хэргийн хохирогч болох тохиолдол сүүлийн хоёр жилийн дотор бараг дөрөв дахин нэмэгдсэн тухай тус улсын Үндэсний цагдаагийн газрын мэдээллээс эш татан нэгэн хууль тогтоогч ням гарагт мэдээлжээ.
Тодруулбал, эрх баригч Ардчилсан намын гишүүн Ким Жүн Хванын мэдээлснээр, залилангийн хохирогч болсон гадаадын иргэдийн тоо 2023 онд 5307 байсан бол 2024 онд 8671, өнгөрсөн онд 19907 болж огцом өссөн байна.
Дээрх хэргүүдийн ихэнх нь “Халлю” буюу Солонгосын поп соёлын гадаад дахь шүтэн бишрэгчдийг онилсон байна. Залилагчид К-поп оддын бараа бүтээгдэхүүнийг санал болгож, мөнгийг нь шилжүүлэн авсныхаа дараа ор сураггүй алга болжээ.
БНСУ-ын зүүн өмнөд нутгийн Бусан хотод К-попийн алдарт "BTS" хамтлагийн тоглолт болсон зургаадугаар сарын 12-13-ны өдрүүдэд гадаадын иргэдийг хохироосон таван гэмт хэрэг бүртгэгдсэний гурав нь залилан байжээ.
Статистик мэдээллээс үзэхэд, сүүлийн хоёр жилийн хугацаанд бүх төрлийн гэмт хэргийн хохирогч болсон гадаадын иргэдийн тоо 81.7 хувиар өсөж, 2023 онд 28048 байсан бол өнгөрсөн онд 50975 болж нэмэгдсэн байна.
БНСУ-д зочлох гадаадын жуулчдын тоо огцом нэмэгдэж байгаа энэ үед гадаадын иргэдийг онилсон гэмт хэргээс урьдчилан сэргийлэх арга хэмжээг эрчимжүүлэхийг эрх баригч намын хууль тогтоогч уриаллаа.
Засгийн газрын аялал жуулчлалын статистик мэдээллээр, тус улсад зочилсон гадаадын жуулчдын тоо сүүлийн хоёр жилийн дотор 71.7 хувиар өсөж, 2023 онд 11 сая байсан бол өнгөрсөн онд 18.9 саяд хүрсэн байна.
Эх сурвалж: Yonhap
