Бүгд Найрамдах Болгар Улсын Ерөнхийлөгчийн ивээл дор жил бүр зохион байгуулдаг “Алтан Феми” олон улсын кино наадамд Монголын уран бүтээлчид таван “Алтан цом” хүртжээ.

Энэхүү наадмыг олон улсын уран сайхны болон баримтат кино бүтээгчдийг нэгтгэх, соёлын харилцааг өргөжүүлэх зорилгоор 2023 онд анх зохион байгуулж иржээ.

Тус наадмын 2026 оны шагнал гардуулах ёслолын ажиллагаа зургаадугаар сарын 6-ны өдөр Софи хотод болсон бөгөөд энэ жилийн хувьд “хөгжлийн бэрхшээлтэй хүмүүст урам зориг өгөх түүх, экологи, байгаль орчны хамгаалал, аутизмтай хүүхдүүдийн нийгмийн оролцоо болон тэдэнд тулгамдаж буй асуудал, эмэгтэйчүүдийн хүчирхийллээс урьдчилан сэргийлэх,тэмцэх зэрэг сэдвийг хамарсан байна.

Бүгд Найрамдах Болгар Улс дахь Монгол Улсын Элчин сайдын яам “Алтан Феми” наадмын урилгыг Гадаад харилцааны яамаар дамжуулан Монголын уран бүтээлчдэд хүргэсний үр дүнд 8 уран бүтээлч кино ирүүлснээс найруулагч Э.Ган-Очирын “Их говийн манаач”, найруулагч О.Урантуяагийн “Явуулын хүн Говьд”, найруулагч Т.Алтантуяагийн “Хөх тавилан”, найруулагч Г.Бямбасүрэнгийн “Хувь заяа”, Д.Галбаярын “Эмэгтэйн кейс” бүтээл шалгарч, “Алтан цом” шагнал хүртжээ. Ийнхүү “Алтан Феми” кино наадамд дэлхийн 130 орны 9600 уран бүтээлч өрсөлдсөнөөс манай 5 уран бүтээлч төрөл тус бүрт “Алтан цом” хүртсэн нь улс орныхоо нэр хүндийг өндөрт өргөсөн бахархалтай сайхан үйл явдал болжээ.

“Их говийн манаач” баримтат киноны продюсер Ж.Мядагбадам, зураглаач С.Боргил, “Явуулын хүн говьд” уран сайхны киноны найруулагч О.Урантуяа, продюсер, жүжигчин Д.Урантунгалаг, гүйцэтгэх продюсер О.Уянга нарын уран бүтээлчид Монголоос шагнал гардуулах ёслолыг зорин очиж, “Алтан цом” шагналаа гардан авсан байна.

Мөн найруулагч Т.Алтантуяагийн “Хөх тавилан”, Г.Бямбасүрэнгийн “Хувь заяа”, Д.Галбаярын “Эмэгтэйн кейс” киноны шагнал “Алтан цом”-ыг Монгол Улсаас Болгар Улсад суугаа Элчин сайд Л.Саянаа уран бүтээлчдийн нэр өмнөөс гардан авчээ.

“Алтан Феми” кино наадмаас Польш Улс 2, Мороко 2, Кипр 2, Индонези 2, Вьетнам 1, Ливан 1, Аргентин 1, Армен 1 “Алтан цом” шагнал тус тус авсан байна.

Тус наадмын “Алтан цом” хүртсэн “Явуулын хүн говьд” бүтээлийн гол дүрд Үндэсний урлагийн их театрын жүжигчин, уртын дуучин Д.Урантунгалаг тогложээ. Тэрбээр шагнал гардуулах ёслолд энэхүү киноны дуу болох “Алсын говь” уртын дуугаар өргөн зочдын сонорыг мялаав.