Халуун орны "Жанми" хэмээх догшин хар салхи өнөө өглөө Японыг дайрч, хүчтэй салхи, аадар бороо дагуулсны улмаас тээврийн хөдөлгөөн, аж ахуйн нэгжүүдийн үйл ажиллагаа саатаж, хэдэн арван мянган өрх гэрэл цахилгаангүй болжээ.

Японы Цаг уурын агентлагийн мэдээлснээр, хар салхины төв хэсэг тус улсын гол арал болох Хоншюгийн төв хэсгийн эрэг хавиар секундэд 25 метр хүртэл хурдтай Токио хот орчмын бүсийг чиглэн зүүн хойд зүгт шилжиж байна.

Хар салхины төв дэх агаарын даралт 980 гектопаскаль байгаа бөгөөд байгалийн гамшгийн улмаас одоогоор 60 мянга орчим өрхийн цахилгаан хангамж тасалдаад байна гэж тус улсын Засгийн газрын хэвлэлийн төлөөлөгч Минорү Кихара ээлжит хэвлэлийн бага хурлын үеэр мэдэгджээ.

Цаг агаарын таагүй байдлын улмаас "Japan Airlines", "All Nippon Airways" зэрэг агаарын тээврийн компаниуд өнөөдрийн байдлаар олон улсын болон дотоодын 900 орчим нислэгийг цуцлаад байна.

Түүнчлэн цаг агаарын онцгой хүндрэлтэй нөхцөл байдал үүссэнтэй холбогдуулан “Toyota Motor” компани өнөөдөр өглөөнөөс эхлэн дотоод дахь 13 үйлдвэрийнхээ үйл ажиллагааг түр зогсоосноо мягмар гарагт мэдэгдсэн байна.

Эх сурвалж: Reuters