АНУ-ын Төрийн нарийн бичгийн дарга Марко Рубио өчигдөр буюу мягмар гарагт Армени улсад богино хугацааны айлчлал хийжээ.

Тэрбээр Энэтхэгээс буцах замдаа Ереван хотын “Звартноц” нисэх онгоцны буудалд 1 цаг орчмын хугацаанд саатахдаа Армени улсын Гадаад хэргийн сайд Арарат Мирзоянтай уулзаж, хоёр улсын хооронд Бүрэн хэмжээний стратегийн түншлэл тогтоох тухай Хартид гарын үсэг зурсан байна.

Мөн талууд “Нэн чухал эрдсүүдийн тухай”, “Газрын ховор элементүүдийн тухай”, “Трампын маршрутын тухай” /TRIPP/ тухай хэлэлцээрүүдэд гарын үсэг зуржээ. TRIPP буюу "Олон улсын энх тайван, хөгжил цэцэглэлтийн төлөөх Трампын маршрут” хэмээх дамжин өнгөрөх коридор нь Азербайжаны Нахичеваны өөртөө засах мужаас Армений Сюник мужаар дамжин Азербайжаны үндсэн нутаг дэвсгэрт хүрэх юм.

“Өнөөдрийн эдгээр бүх тохиролцоо нь Арменид ашигтай бөгөөд хязгааргүй их боломжийг бидний өмнө нээж байна” гэж Мирзоян хэлснийг Арменийн ARKA мэдээллийн агентлаг уламжиллаа. М.Рубио хэлэхдээ “TRIPP төслийн хүрээнд хамтран ажиллах тухай гэрээ нь Армени болон бүс нутгийн энх тайван, хөгжил цэцэглэлтэд чиглэсэн замыг нээж байна” гэв.

Энэ сард инженерчлэлийн зөвлөгөө өгдөг Америкийн AECOM компанийн ажилтнууд Арменид ирж, TRIPP төслийн дэд бүтцийг барих газрын судалгааг хийж эхэлжээ. Уг ажлыг АНУ-ын Төрийн департаментын дэргэдэх Дэд бүтэц, хөрөнгө оруулалтын дэлхийн түншлэлийн сангаас санхүүжүүлэх юм.

Харин Арменийн сөрөг хүчнийхэн “тус улсын нутаг дэвсгэрийн зарим хэсгийг гадаадынхны мэдэлд өгч байгаад” санаа зовниж буйгаа илэрхийлжээ.

Үүнтэй холбогдуулан дурдахад, удахгүй 6 дугаар сарын 7-нд болох парламентын сонгуулийн өмнө Ерөнхий сайд Никол Пашинян болон сөрөг хүчнийхэн бие биенийгээ “эх орноосоо урвасан” хэмээн буруутгасаар байна. Зарим улстөрчид Оросын тусгай албадтай холбоотой гэсэн мэдээлэл хэвлэлүүдэд гарсаар байгаа ажээ.