Франц руу чиглэсэн цагаачлалыг гурван жилийн хугацаагаар түр зогсоох тухай саналыг тус улсын Хуульзүйн сайд Жеральд Дарманен дэвшүүлсэн байна.
Түүний үзэж байгаагаар, гадаадын иргэдийг Францын нийгмийн амьдралд дасан зохицуулах боломж “дээд цэгтээ тулжээ”. Иймээс цагаачлалын бодлогыг чангатгаж, одоо тус улсын нутаг дэвсгэрт байгаа цагаачдыг дасан зохицуулахад голлон анхаарах нь чухал байгааг сайд онцолжээ.
“Францаас гаргах ёстой хүмүүсийг гаргаад, цагаачлалыг зогсооцгооё, Францын нутаг дэвсгэрээс гарсан хүмүүсийн тооноос хамааруулан виз олгоё, одоо байгаа хүмүүсийг дасан зохицуулах ажлыг хийцгээе” хэмээн тэрбээр уриалсан байна. Мөн гэр бүлтэйгээ нэгдэх хөтөлбөрийн хүрээнд оршин суух виз олгохыг хязгаарлахыг санал болгожээ.
Цагаачлалын асуудал нь Францын улстөрчдийн хувьд мэтгэлцээний гол сэдэв болоод байгаа юм. Тус улсын Дотоод хэргийн яамны мэдээллээр, 2025 онд 4.5 сая цагаачдад оршин суух зөвшөөрөл олгосон бөгөөд тэдний гуравны нэг нь гэр бүлтэйгээ нэгдэх хөтөлбөрийн хүрээнд уг зөвшөөрлийг авсан ажээ.
Статистик мэдээллээр, Францад хууль ёсоор оршин сууж буй гадаадын иргэдийн тоо тус улсын хүн амын 8-аас дээш хувийг эзэлж байна.
