БНАрдчилсан Конго улсад эбола вирусний халдварын 900 гаруй сэжигтэй тохиолдол, 101 батлагдсан тохиолдол бүртгэгдсэн байна. Энэ тухай ДЭМБ-ын тэргүүн Тедрос Аданом Гебрейесус Х нийгмийн сүлжээний хуудсандаа мэдээлжээ.

Түүний үзэж байгаагаар, халдварын хяналтын арга хэмжээнүүдийг идэвхжүүлснээр өвчний илрүүлэг нэмэгдсэн байна. БНАКонго улсын засгийн газрын мэдээлснээр, 24-ний оройны байдлаар халдвар авсан 204 хүн нас баржээ.

Халдварын голомт болох зүүн хойд нутгийн Итури мужид 5 сая орчим хүн амьдардаг ба дөрвөн хүн тутмын нэгд нь хүмүүнлэгийн тусламж шаардлагатай байгаа бол таван хүн тутмын нэг нь дотооддоо дүрвэсэн хүмүүс байна.

ДЭМБ-ын Ерөнхий захирлын үзэж байгаагаар, Конгод газар авсан хүчирхийлэл нь эрүүл мэндийн болон хүмүүнлэгийн байгууллагуудын ажилтнуудыг дүрвэн зугтахад хүргэж байна. Энэ нь эбола вирусний халдварын цар хүрээг тодорхойлох, халдварыг эхлэл шатанд нь илрүүлж, эмнэлгийн тусламж үзүүлэхэд ноцтой саад учруулж байгаа юм. Гэсэн хэдий ч ДЭМБ болон түүний түнш байгууллагууд Итури мужид үйл ажиллагаагаа үргэлжлүүлсээр байгаа бөгөөд эбола төдийгүй бусад өвчний тархалттай тэмцсээр байна. Тус мужид энэ сарын 15-ны өдөр эболагийн халдварын тохиолдол анх илэрсэн юм.

Мөн одоогийн байдлаар Уганда улсад 7 батлагдсан тохиолдол бүртгэгдээд байна. Харин тус улсын эрх баригчид сэжигтэй тохиолдлуудын талаарх мэдээллийг нийтлэхгүй байгаа ажээ.

Халдвар авсан хүмүүсийн биеийн шингэнд шууд хүрэлцэх үед эболагийн халдвар тархдаг бөгөөд далд үе нь гурван долоо хоног хүртэлх хугацаагаар үргэлжилдэг. Энэ удаагийн халдварын дэгдэлт нь 2007 онд анх илэрсэн ховор төрлийн Бундибугё гэдэг вирусний омгоос үүдэлтэй бөгөөд үүний эсрэг вакциныг одоогоор гарган аваагүй ба тусгай эмчилгээ байхгүй юм. Энэ төрлийн халдвар авсан хүмүүсийн 30-50 хувь нь нас бардаг байна.

БНАКонго улсад анх 1976 онд эбола вирус илэрснээс хойш 17 дахь удаагаа халдвар дэгджээ.