Монгол Улсын Ерөнхийлөгчийн санаачилгаар НҮБ-ын Ерөнхий Ассамблейгаас жил бүрийн долоодугаар сарын 11-ний өдрийг "Дэлхийн адууны өдөр" болгон тэмдэглэх тухай тогтоолыг баталж, өнгөрсөн жилээс хэрэгжиж байна.
Монгол морины өв соёл, уламжлалыг олон улсад сурталчлах хүрээнд Бүгд Найрамдах Итали Улсад суугаа Монгол Улсын ЭСЯ-ны төлөөлөл Италийн Тоскана мужийн Сиена хотын дарга болон тус улсын алдарт "Palio di Siena” морин уралдааныг зохион байгуулагчидтай уулзаж, ирэх долоодугаар сарын 11-ний өдөр зохион байгуулах "Дэлхийн адууны өдөр" болон Үндэсний их баяр наадмын тухай танилцуулж, цаашдын хамтын ажиллагааны талаар санал солилцлоо.
Италийн Сиена хотод жил бүр зохиогддог "Палио" нь Дундад зууны үеэс өнөөг хүртэл тасралтгүй хадгалагдаж ирсэн Европ тивийн хамгийн алдартай, түүхэн уралдаан юм. Анх 6 дугаар зуунаас үүсэлтэй энэхүү уралдаан нь Сиена хотын 17 дүүрэг хоорондоо өрсөлддөг соёлын томоохон арга хэмжээ юм. Хотын төв талбай "Piazza di Campo"-гийн чулуун шалан дээр тусгайлан шороо асгаж, эмээлгүй морьдоор уралддаг бөгөөд ердөө 90 секунд орчим үргэлжилдэг ч маш ширүүн өрсөлдөөн, тактик шаардсан, үзүүштэй уралдаан болдог байна.
