Далайгаар тээвэрлэж буй Оросын газрын тосыг хоригоос чөлөөлсөн хугацааг дахин нэг сараар сунгах шийдвэрийг АНУ-ын Сангийн яам гаргасан тухай Сангийн сайд Скотт Бессент даваа гарагт мэдэгджээ.

Шинээр өгч буй 30 хоногийн зөвшөөрөл нь “нийлүүлэлтээс хамааралтай эмзэг улс орнуудад Оросын нефтийг түр хугацаанд худалдан авах боломжийг олгоно” гэж сайд Х нийгмийн сүлжээний хуудсандаа бичсэн байна. Ройтерс агентлаг саяхан мэдээлснээр, хэд хэдэн улс Оросын нефтийг худалдан авах хугацааг сунгахыг хүссэний дараа дээрх зөвшөөрлийн хугацааг сунгасан ажээ.

Танкеруудад ачигдсан байгаа нефть ба нефтийн бүтээгдэхүүнийг хоригоос түр чөлөөлөх тухай өмнөх шийдвэрийн хүчинтэй хугацаа 16-ны өдөр дууссан бөгөөд хугацааг сунгахгүй хэмээн С.Бессент мэдэгдэж байсан юм.

Ираны эсрэг явуулж буй байлдааны ажиллагааны улмаас эрчим хүчний эх үүсвэрүүдийн үнэ өсөж буй үед Оросын нефтийг хоригоос түр чөлөөлөх шийдвэрийг АНУ-ын Сангийн яам 3 дугаар сарын 13-нд гаргасан бөгөөд хугацаа нь 4 дүгээр сарын 11-нд дууссан юм. Үүний дараа хугацааг 5 дугаар сарын 16 хүртэл сунгасан байна.

The New York Times сонинд бичсэнээр, хоригийг зөөлрүүлснээс хойш Оросын тал өдөр бүр 100 сая гаруй долларын нэмэлт орлого олж байгаа ажээ. Олон улсын эрчим хүчний агентлагийн мэдээллээр, 2 дугаар сартай харьцуулахад 3 дугаар сард олсон орлого бараг хоёр дахин нэмэгдэж, 19 тэрбум долларт хүрсэн байна.