АНУ-ын Ерөнхийлөгч Дональд Трампын Хятадад хийсэн айлчлалын үеэр Бээжин, Вашингтон хоёр зарим нэр төрлийн барааны гаалийн татварыг бууруулахаар "зарчмын хувьд" тохиролцсон тухай Хятадын Худалдааны яам мэдээлжээ.
Тус яам өнгөрсөн пүрэв гарагт хийсэн АНУ-ын Ерөнхийлөгч Дональд Трамп, БНХАУ-ын удирдагч Ши Жиньпин нарын хэлэлцээний үеэр хүрсэн эдийн засаг, худалдааны тохиролцооны талаар мэдээлэл өгсөн байна. Хоёр улс худалдаа, хөрөнгө оруулалтын асуудлыг хариуцах зөвлөлүүдийг байгуулах, мөн эдгээр зөвлөлийн хэлэлцүүлгийн хүрээнд талуудын санааг зовоож буй зарим бараа бүтээгдэхүүний тарифыг бууруулахаар зарчмын хувьд тохиролцсон гэж Худалдааны яамны мэдэгдэлд дурджээ.
Түүнчлэн Хятадын сүүн бүтээгдэхүүн, Америкийн үхрийн мах зэрэг хөдөө аж ахуйн бүтээгдэхүүний импортод тавиад буй хязгаарлалтуудыг эргэн харж, худалдааг өргөжүүлэх чиглэлээр хамтран ажиллана гэж мөн мэдээлсэн байна.
Нисэхийн салбарын хамтын ажиллагааны хувьд Хятадын компаниуд АНУ-аас нисэх онгоц худалдаж авах, АНУ-аас Хятадад нисэх онгоцны хөдөлгүүр болон дагалдах эд ангиудыг нийлүүлэхээх тохиролцжээ. Д.Трамп Ши Жиньпинтэй хийсэн уулзалтынхаа талаар мэдэгдэхдээ, Хятад улс АНУ-аас хэдэн тэрбум долларын өртөг бүхий 200 ширхэг Boeing онгоц болон шар буурцаг худалдан авахыг зөвшөөрсөн гэжээ.
Хоёр тал одоогоор хэлэлцээрийн нарийн ширийн заалтуудыг үргэлжлүүлэн хэлэлцэж байгаа бөгөөд эцсийн хувилбарыг аль болох түргэн эцэслэн батлахыг зорьж байна гэж яамны төлөөлөгч мэдэгдсэн байна.
Эх сурвалж: NHK
