АНУ-аас НҮБ-аар дамжуулан олгох 1.8 тэрбум ам.долларын хүмүүнлэгийн шинэ тусламжийг Д.Трампын засаг захиргааны гадаад бодлогын ашиг сонирхолд нийцүүлэн зарцуулна гэж Төрийн департаментын тусламж хариуцсан өндөр албан тушаалтан пүрэв гарагт мэдэгджээ.
Энэхүү санхүүжилт нь өнгөрсөн оны 12 дугаар сард АНУ-аас зарласан 2 тэрбум ам.долларын тусламж дээр нэмэгдэж байгаа юм. АНУ болон бусад хөгжилтэй орнууд тусламжийн зардлаа танаж байгаа энэ үед тусламжийн санхүүжилт, олголтыг илүү үр ашигтай болгох, хариуцлагыг нэмэгдүүлэх зорилготой шинэ механизмын хүрээнд уг хөрөнгийг хуваарилж байна.
Уг шинэ механизмаар дамжуулан олгосон АНУ-ын тусламжийн 92 хувийг НҮБ-ын Хүмүүнлэгийн үйл хэргийг хариуцсан газрын “нэн тэргүүнд анхаарах” гэж тодорхойлсон тусламж хамгийн их хэрэгцээтэй улс орнуудад үзүүлсэн гэж И.Маскийн удирдаж байсан, засгийн газрын үр ашгийг дээшлүүлэх агентлагийн (DOGE) хуучин ажилтан, одоо Гадаад тусламж, хүмүүнлэгийн асуудал болон шашны эрх чөлөөний асуудал эрхэлсэн Төрийн нарийн бичгийн дэд дарга Жереми Левин мэдэгджээ.
АНУ-ын тусламж "Ерөнхийлөгч Д.Трампын бодлоготой нийцсэн, мөн манай гадаад бодлогын ашиг сонирхол байгаа газрууд руу чиглэсэн" гэж тэрбээр хэлсэн байна.
НҮБ-ын Хүмүүнлэгийн үйл хэргийг хариуцсан газрын дарга Том Флетчер Ж.Левинтэй хамт мэдээлэл хийх үеэрээ хэлэхдээ, санхүүжилт багасаж, дэлхий даяар 300 сая хүнд тусламж шаардлагатай байгаа энэ үед НҮБ хүмүүнлэгийн тогтолцоогоо шинэчлэхийн зэрэгцээ төвийг сахисан, шударга байх зарчмаа тууштай баримталж байна гэжээ.
Түүний мэдээлснээр, АНУ-ын сүүлчийн санхүүжилтийг зарлахаас өмнө НҮБ-ын Хүмүүнлэгийн үйл хэргийг хариуцсан газар энэ онд төвлөрүүлэхээр зорьсон 23 тэрбум ам.доллароос гишүүн 65 улсаас 7.38 тэрбум ам.долларыг төвлөрүүлээд байжээ.
Эх сурвалж: Reuters
